Ujërat e plazheve janë pastruar, por rëra lë për të dëshiruar – Agjencia e Mjedisit: Duhen informuar qytetarët
Cilësia e ujërave të plazheve në Shqipëri është përmirësuar këtë vit. Rezultati vjen nga monitorimi i kryer gjatë muajit Maj nga Agjencia Kombëtare e Mjedisit.
“Agjencia Kombëtare e Mjedisit ka bërë një monitorim kampionimi në 102 pika përgjatë vijës bregdetare dhe ka realizuar monitorimin e ujërave larës në 20 plazhe. Nga analizat rezulton cilësi shumë e mirë në rreth 99 pika monitorimi, pra mund të themi që plazhi mirëpret me një cilësi shumë të mirë uji të gjithë pushuesit”, deklaroi gjatë një konference për shtyp, Julian Beqiri, kreu i kësaj agjencie.
Megjithatë, problematika kryesore nuk është më cilësia e ujit larës, por pastërtia e rërës e cila “lë shumë për të dëshiruar”. Për këtë, Agjencia e Mjedisit akuzoi Bashkitë e vendit, të cilat janë larg detyrës që duhet të bëjnë, për të menaxhuar si duhet plazhet.
Mungesa e koshave për të hedhur mbeturinat, pastrimi i gabuar ose mospastrimi i plazheve kanë krijuar një situatë shumë problematike përgjatë vijës bregdetare. Ky informacion i tillë, sipas agjencisë, duhet ndarë me publikun duke vendosur tabela njoftuese për cilësinë.
Sa i takon plazheve, Agjencia i ka klasifikuar sipas cilësisë së ujit larës.
Kështu, cilësia është shumë e mirë në plazhet e: Divjakës, Velipojës, Tales, Shëngjinit, Gjiri të Lalzit, Golemit, Qerretit, Spillesë, Orikumit, Zvërnecit, Vlorës, Dhërmiut, Himarës, Qeparoit, Borshit, Ksamilit, Sarandë, Semanit, Durrësit dhe Palasës.
Cilësia e ujërave larës është brenda standardeve në plazhet: tek Shkolla e Marinës në Vlorë, tek Kanali i Çukës në Sarandë dhe tek Kompleksi Giardino në Durrës. Këto tre pika janë përmirësuar, pasi në vitin 2016 renditeshin mes zonave me cilësi të keqe uji.
Cilësia e ujërave larës është e keqe në dy zona në Durrës: në Plazhin Zhiron dhe Pas Kanalit tek Plepat.
Ndërkohë një raport i ngjashëm për cilësinë e ujit, nga Agjencia Europiane e Mjedisit ka dhënë rezultate të ngjashme, me përjashtim të 5 zonave shtesë, ku rekomandon turistët që të mos lahen:
- Grykëderdhja në Sarandë e Lumit Bistrica
- Zona e portit në Sarandë
- Vlora
- Shkëmbi i Kavajës
- Plazhi pranë shëtitoret Taulantia
Angelo Haruni/SCAN
Agjencia Europiane, raport për ujërat e plazheve shqiptare – Cilat janë 12 zonat me cilësi të shkëlqyer dhe 5 zonat që duhet t’i evitoni këtë vit
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.