Ujësjellësi i Tiranës, projekt për zyra të reja qendrore! Ku do të ndërtohet godina e re me sipërfaqe 5 mijë metra katrorë
Ujësjellësi i Tiranës drejt “transferimit”- Projekt për zyra të reja qendrore! Ku do të ndërtohet godina e re me 5 mijë metra katrorë
Ujësjellësi i Tiranës po planifikon ndërtimin e një godine të re që do të shërbejë si zyrë qendrore. UKT ka bërë shpalljen e garës ku është vendosur në dispozicion një fond prej 8 milion lekësh për hartimin e Projekt – Preventivit të zbatimit të objektit të ndërtimit të zyrave qendrore në Tiranë. Kohëzgjatja e kontratës ose afati kohor për ekzekutimin: 3 muaj nga data e lidhjes se kontratës.
Afati kohor për dorëzimin e ofertave ose kërkesave për pjesëmarrje është 09 janari i vitit 2019, ora 09:00, raporton portali ekonomik SCAN.
Referuar dokumenteve që shoqërojnë shpalljen objekti që do të ndërtohet do të jetë në rrugën Jordan Misja në kryeqytet, përballë Gjykatës së Krimeve të Rënda e pranë zonës ku ndodhen Zyrat e Regjistrimit të Pasurive të Paluajtshme. Parcela për zhvillim me sipërfaqe prej 2400 m2, ka një front rreth 90 metra. Aktualisht, aty ndodhet një godinë 1 katëshe e shtrirë paralel me rrugën. Kjo ndërtesë, me qellim ndërtimin e strukturës së zyrave qendrore të UKT, do të shembet.
“Qëllimi i detyrës së projektimit është hartimi i projekt- preventivit të zbatimit të objektit : “Ndërtimi i zyrave qëndrore të Ujësjellës Kanalizime Tiranë sh.a“ sipas normativave të projektimit për godina për funksion administrativ. Zyrat qendrore të UKT, duke gjykuar nga organigrama e ndërmarrjes, duhet të akomodojnë një staf prej 200 personash aktualisht, me një perspektivë rritje edhe me 40 të tjerë. Për këtë arsye, në respektim të standarteve të hapësirës së dedikuar funksioneve administrative kryesisht të orientuara në tipologjinë “open space”, ndertesa e re, do të duhet të ketë një sipërfaqe prej 4000 m² mbi tokë duke përfshirë këtu edhe një pikë shërbimi KNK (kujdesi ndaj klientit) dhe 1000m² nëntokë për parkim dhe hapësirë teknike në shërbim të objektit” shkruhet në dokumentet që shoqërojnë shpalljen.
Godina e re do të ketë recepsionin, sallën e pritjes dhe pagesave, kujdesin ndaj klientit, hapësira pritjeje dhe poste pune për sektorin e ankesave, specialistët dhe drejtorin e sektorit, dhomë serverësh, call center, zyra të ndryshme pune të ndara sipas funksioneve, etj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.