Ujësjellësit, kredi për borxhet e energjisë – Plani i qeverisë/ Jo fshirje të detyrimeve, garanci nga bashkitë për likujdimin e kësteve
Pamundësia për të ndalur kompanitë e ujësjellës kanalizimeve të krijojë borxhe ndaj Operatorit të Shpërndarjes së Energjisë Elektrike, ka detyruar qeverinë të parashikojë instrumente të rinj financiarë për të garantuar pagesat e energjisë elektrike në kohë. Përmes një plani veprimi të përbashkët mes Ministrisë së Financave dhe asaj të energjisë theksohet se nuk do të ketë më falje të detyrimeve të prapambetura, ndërkohë që instrumentet e rinj konsistojnë në marrëveshje debitimi direkt midis ndërmarrjeve të ujit dhe OSHEE/FSHU-së të garantuara nga overdrafte apo linja kredie bankare, nëse është nevoja dhe me mbështetjen e qeverive vendore, bazuar në rregullat e forcimit të financave publike.
Skema e garancisë të pagesave do të pilotohet fillimisht në 1 deri 3 ndërmarrje ujësjellësi me financa të shëndosha në gjendje për të përballuar kostot e energjisë elektrike. Pas pilotimit dhe vënien në funksion të këtyre instrumenteve, ata do të shtrihen fillimisht në 5 kompanitë më të mëdha të ujit, që kanë 62% të borxheve ndaj sektorit të energjisë, ndërsa deri në vitin 2023 do të përfshijë 10 kompanitë më mëdha, që gjenerojnë 80% të detyrimeve të prapambetura.
Megjithatë, pavarësisht se masat e reja nuk stimulojnë faljen e borxheve të vjetra, parashikohet se zbatimi i suksesshëm i këtij instrumenti për çdo ndërmarrje mund të ndiqet nga fshirja e borxheve të akumuluara të saj, të ngjashëm me emetimin e vitit 2014,në rast se kompanitë tregojnë performancë të kënaqshme për mos-krijimin e detyrimeve të reja. Sipas të dhënave zyrtare sektori i ujit akumulon mesatarisht 1.5 miliardë lekë detyrime çdo vit, që pothuajse dyfishohen nga kamatëvonesat, ndërkohë që, reforma e vonuar e sektorit të ujit dhe mekanizmi i dobët i ekzekutimit të pagesave të energjisë elektrike çuan në ri-akumulimin e detyrimeve të prapambetura sa niveli i fshirë në fillim të reformës, në vitin 2014.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.