Ujësjellësit rritën borxhet për energjinë – Plani i qeverisë për reduktimin e stokut s’ka dhënë rezultate. Kreu i ERRU kërkoi rritje tarifash 

Teksa kreu i Entit Rregullator të Ujit kërkoi nga foltorja e parlamentit rritjen e çmimeve të ujit, si e vetmja formë për të likuiduar borxhet e prapambetura të energjisë, të dhënat tregojnë se plani i veprimit të vitit 2020, që synonte ndër të tjera reduktimin e qëndrueshëm të stokut të detyrimeve të prapambetura të akumuluara deri më sot ndërmjet kompanive, nuk ka funksionuar.

Kjo pasi, sipas të dhënave zyrtare borxhet e kompanive të ujësjellësve ndaj OSHEE-së arritën në 15.72 mld lekë në vitin 2021, nga 13.64 mld lekë që ishin një vit më parë. Paralelisht, buxheti i shtetit shumëfishoi subvencionet për likuidimin e faturave të energjisë, teksa transferoi pranë këtyre shoqërive 380 mln lekë,  apo 150 mln lekë më shumë se një vit më parë.

Plani i veprimit i hartuar nga Ministria e Financave dhe Ekonomisë dhe Ministria e Infrastrukturës dhe Energjisë parashikonte instrumente të rinj financiarë, që konsistojnë në marrëveshje debitimi direkt midis ndërmarrjeve të ujit dhe OSHEE/FSHU-së, të garantuara nga overdrafte apo linja kredie bankare, nëse është nevoja dhe me mbështetjen e qeverive vendore. Skema e garancisë të pagesave do të pilotohej fillimisht në 1 deri 3 ndërmarrje ujësjellësi me financa të shëndosha në gjendje për të përballuar kostot e energjisë elektrike.

Pas pilotimit dhe vënien në funksion të këtyre instrumenteve, ata do të shtrihen fillimisht në 5 kompanitë më të mëdha të ujit, që kanë 62% të borxheve ndaj sektorit të energjisë, ndërsa deri në vitin 2023 do të përfshinte 10 kompanitë më mëdha, që gjenerojnë 80% të detyrimeve të prapambetura. Këto të dhëna vijnë në një kohë kur qeveria ka përgatitur një projektvendim, që parashikon bashkimin e kompanive të ujsjellësve si dhe kalimin e 51% të aksioneve të shoqërive të krijuara nga bashkitë, te Ministria e Infrastrukturës dhe Energjisë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.