Ukraina, “dritë jeshile” eksportit – Produktet shtazore shqiptare për herë të parë në një treg të huaj
Të gjitha produktet shqiptare me origjinë shtazore, si mish, qumësht dhe nënproduktet e tyre mund të eksportohen në një vend të huaj. Konkretisht Ukraina, i hap dritën jeshile importeve të produkteve të mishit dhe bulmetit.
Alban Zusi president i Qendrës së Eksporteve Shqiptare në një deklaratë për median bëri të ditur heqjen e të gjitha barrierave nga qeveria e Ukrainës, të cilat pengonin eksportin e produkteve shqiptare të mishit dhe qumështit Përmes një letre dërguar Qendër së Eksporteve Shqiptare, nga Boris Kobal drejtor i Shërbimit Shtetërorë të Sigurisë Ushqimore dhe Mbrojtjes së Konsumatorit në Ukrainë, njoftohet se Shqipëria tashmë mund të eksportojë produktet e saj blegtorale.
Me këtë zhvillim, Ukraina kthehet në tregun e parë të rëndësishëm me potencial për eksportin e munguar të produkteve me origjinë blegtorale të pa eksportuara këto 27 vite në asnjë treg botëror.
Për ta konkretizuar këtë mundësi për eksportet shqiptare, Qendra e Eksporteve Shqiptare në bashkëpunim me Dhomën e Tregtisë së Doneskut, organizojnë në Tiranë më 28 dhe 29 Prill, forumin e parë të biznesit Shqipëri – Ukrainë. Një prej qëllimeve kryesore të Dhomës së Tregtisë së Doneskut në bashkëpunim me Qendrën e Eksporteve Shqiptarë është nevoja e pasjes së një marrëveshje të tregtisë së lirë mes Shqipërisë dhe Ukrainës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.