Ulen interesat e borxhit – Huamarrja e brendshme mban peshën kryesore

Niveli i borxhit publik ka ardhur në rënie gjatë këtij viti, çka ka bërë që dhe interesat për të të ulen.

Referuar të dhënave zyrtare të Ministrisë së Financave, shpenzimet për interesa të borxhit për 7 mujorin rezultojnë të jenë në vlerën 17 miliardë lekë, nga të cilat 12.7 miliardë janë interesa për huamarrjen e brendshme dhe 4.3 miliardë lekë janë shpenzime për interesa për borxhin e huaj.

Në të njëjtën periudhë të një viti më parë, sipas statistikave të Financave, interesat kapnin vlerën e 20.5 miliardë lekëve.

Ndërkohë për këtë vit akoma nuk është prekur fondi i kontigjencës për risqet e borxhit i programuar në masën 4 miliardë lekë. Lëvizjet jo të favorshme në tregjet ndërkombëtare gjatë viteve të fundit, si dhe për të “zbutur” sadopak risqet, ka bërë që qeveria shqiptare të orientojë  huamarrjen drejt tregut vendas.

Kështu referuar treguesve zyrtarë të borxhit publik, vihet re se peshën kryesore e mban huamarrja e brendshme.

Nga i gjithë  stoku i huamarrjes publike, i cili në fund të qershorit, ishte 1 trilion e 67 miliardë lekë, pjesën më të madhe e mban huamarrja e brendshme,  e cila  kap vlerën e 547.8 miliardë lekë.

Ndërsa borxhi i jashtëm në fund të 6 mujorit rezulton të jetë në shifrën 491.9 miliardë lekë.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.