Ulen sigurimet për frymë – Tirana paguan më shumë, qyteti më i “shpërblyer”
Shqiptarët paguan më pak për tu siguruar në kompanitë private të sigurimeve gjatë vitit që lam pas, ku dendësia e sigurimeve për frymë është ulur me 302 lekë krahasuar me vitin 2019, duke u regjistruar në 5886 lekë. Kjo rënie mund të jetë e ndikuar nga vështirësia ekonomike që ka krijuar për qytetarët pandemia COVID-19 .
Sipas të dhënave zyrtare të Autoritetit të Mbikëqyrjes Financiare, sa i takon kulturës më të lartë të sigurimit, vërehet një përqendrim i tregut të sigurimeve në prefekturat e mëdha, si Tirana me 59.24% të totalit të primeve të shkruara bruto gjatë vitit 2020, Durrësi me 7.41%, Fieri 5.52%, Shkodra 4.62%, Vlora 4.61%, Korça 4.52%. Kjo tendencë përqendrimi ka vijuar e tillë për një periudhë 13-vjeçare.
Sa i takon primit për frymë sipas prefekturave, prefektura Tiranë me 10,780 lekë për frymë zë vendin e parë, e pasuar nga prefektura Gjirokastër me 5,465 lekë për frymë dhe më tej Durrësi me 4,214 lekë për frymë, Vlora me 4,074 lekë për frymë dhe Shkodra me 3,887 lekë për frymë. Një tjetër element i rëndësishëm në këtë sektor është edhe vlera e dëmeve të paguara. Sipas AMF-së, përsëri pjesën më të madhe të dëmeve të paguara e ka prefektura e Tiranës me 72.42%, e pasuar nga prefektura Durrës me 12.52%.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.