Ulet borxhi publik – Ministria e Financave: Ka rënë në 65.8% të PBB-së
Borxhi publik ka rënë në tremujorin e parë të këtij viti. Sipas të dhënave nga Ministria e Financave, në fund të marsit vlera e borxhit të qeverisë, përfshi edhe garancitë, arriti në 1 trilion e 85 miliardë lekë, gati dy miliardë lekë më pak krahasuar me fundin e vitit 2017. Sipas Ministrisë së Financave, borxhi ka rënë ndjeshëm në terma realë, në 65.8% të Prodhimit të Brendshëm Bruto, nga 69.9% që kishte qenë në fund të vitit të kaluar.
Megjithatë, kjo shifër është raporti i stokut të borxhit në fund të tremujorit mbi vlerën e projektuar të PBB-së nominale vjetore nga Ministria e Financave. Një shifër më realiste e raportit të borxhit me prodhimin kombëtar mund të jetë e disponueshme në fund të vitit, ndërkohë që objektivi i qeverisë për këtë vit është një borxh në rreth 68.6% të Prodhimit të Brendshëm Bruto.
Shifrat e borxhit sipas monedhës tregojnë se në tremujorin e parë të këtij viti qeveria shqiptare ka shfrytëzuar kryesisht tregun e brendshëm për huamarrje. Borxhi në lekë është rritur me mbi 11 miliardë lekë, ndërsa ai në valutë të huaj është pakësuar me rreth 13 miliardë lekë. Leku vazhdon të ketë një kryesim të lehtë në strukturën e borxhit sipas monedhës, me 50.2% të totalit. Borxhi në valutë ende zë pothuajse gjysmën e totalit, por edhe një pjesë e këtij borxhi është detyrim ndaj kreditorëve rezidentë, në formën e obligacioneve në euro ose kredive për Korporatën Elektroneergjetike Shqiptare.
Borxhi i brendshëm vazhdon të financohet kryesisht nga bankat tregtare, me mbi 60% të stokut total. Individët përbëjnë grupin e dytë më të madh të financuesve të borxhit qeveritar, me afro 16% të totalit, të ndjekur nga institucionet financiare jo banka, me rreth 15%. Pesha e Bankës së Shqipërisë ka rënë në 7.3%, nga mbi 12% që ishte pesë vjet më parë.
Ersuin Shehu/SCAN
Burimi: Ministria e Financave
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.