Ulet numri i lejeve të ndërtimit/ INSTAT: ”T3 2019, për herë të parë më pak se vitet e kaluara”
Numri i lejeve të ndërtimit pësoi rënie për herë të parë pas më shumë se tre vitesh. Të dhënat e Institutit të Statistikave treguan se për tremujorin e tretë në Shqipëri u dhanë 293 leje ndërtimi, 50 leje më pak krahasuar me të njëjtën periudhë të vitit të kaluar. Që nga heqja e moratoriumit të ndërtimeve që u vendos para zbatimit të reformës territoriale, ky është tremujori i parë që lejet e ndërtimit pësojnë rënie me bazë krahasimi vjetore. Në dy tremujorët e fundit, megjithatë, raporti statistikor i Instat për lejet e ndërtimit nuk përfshin Bashkinë Kamëz, që nuk ka raportuar të dhëna.
Të dhënat tregojnë se ulja e numrit të lejeve ka qenë më e theksuar mes ndërtesave tregtare dhe industriale, me 29% më pak krahasuar me një vit më parë. Ndërkohë, për ndërtimet me qëllim banimin, ulja e lejeve ka qenë më e lehtë, me 6% më pak krahasuar me tremujorin e tretë të vitit të kaluar. Në pjesën dërrmuese, lejet për ndërtime rezidenciale i takojnë banesave deri në dy kate. Kjo tregon se në vitet e fundit numri i lartë i lejeve të ndërtimit ka ardhur kryesisht për shkak të uljes së ndërtimeve të reja pa leje.
Qarqet që kanë ndikuar në uljen e numrit të ndërtimeve janë sidomos Shkodra, Elbasani, Berati dhe Gjirokastra. Rënie më të lehtë ka pësuar numri i lejeve të ndërtimit në Durrës dhe Korçë. Ndërkohë, qarku Tiranë sërish ka pasur një numër në rritje lejesh ndërtimi, edhe pa përfshirë të dhënat e bashkisë Kamëz.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.