Ulet numri i të punësuarve në miniera – Gjatë 2020-ës u shkurtuan 944 punonjës, 25% e minatorëve s’kanë sigurim
Numri i punëtorëve në sektorin minerar u reduktua gjatë vitit 2020, në raport me një vit më parë, çka mesa duket reflekton ndikimin negativ të pandemisë së shkaktuar nga COVID-19 në këtë sektor. Sipas të dhënave zyrtare nga Agjencia Kombëtare e Burimeve Natyrore, numri total i punëtorëve u ul në 5187, nga 6131 që ishte në vitin 2019, duke u reduktuar me 944 punonjës. Paralelisht edhe numri i punëtorëve të siguruar në këtë sektor është më i ulët, duke u regjistruar në 3894 gjatë vitit 2020, nga 4587 që ishte në vitin 2019. Përveç reduktimit të këtyre shifrave, ajo që bie në sy është fakti se 25% e minatorëve nuk janë të siguruar.
Viti që lamë pas është konsideruar i vështirë për sektorin e mineraleve, për shkak të situatës së krijuar nga COVID-19, që u pasua me rënien e kërkesës dhe rënien e çmimit të mineraleve në tregjet ndërkombëtare. Megjithatë, në drejtim të ushtrimit të aktivitetit, në Shqipëri nuk pati ndryshime në raport me vitin 2019. Sipas të dhenave zyrtare, ishin 217 subjekte apo 37.4% e atyre që disponojnë leje minerare që nuk ushtruan aktivitet gjatë vitit 2020.
Por, edhe gjatë vitit 2019, ishin 38.4% e subjekteve minerare, që nuk punuan fare, apo 1% më shumë se viti pandemik. Ndërkaq, pavarësisht krizës një numër i konsiderushëm subjektesh investuan një vlerë totale prej 2.24 mld lekë apo 21.9 mln USD gjatë vitit 2020. Subjektet minerare me kapital të huaj kanë investuar 789.9 mln lekë apo 7.74 mln USD. Ndërkohë që vlera e investimeve nga ana e kompanive me kapital shqiptar është edhe më e madhe, duke u regjistruar në 1.45 mld lekë apo 14.2 mln USD.
GRAFIK
Numri i punëtorëve në sektorin minerar
2019 6 131 punëtorë
2020 5 187 punëtorë
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.