Ulet TVSH-ja për investimet në sport. Komisioni i Ekonomisë diskuton edhe “lehtësimin” e 5300 bizneseve
Investimet sportive nuk do të trajtohen më me TVSH 20 për qind, por norma e tatimit do të reduktohet në 6 për qind për të gjitha veprimtaritë në ndërtim të këtyre ambienteve, duke ulur kostot për federatat. Ndryshimet në ligjin “Për tatimin mbi vlerën e shtuar në Republikën e Shqipërisë” janë diskutuar në Komisonin Parlamentar të Ekonomisë dhe sipas Ministres së Financave Anila Denaj, qëllimi është nxitja e investimeve private dhe shtetërore në fushën e sportit.
“Në dispozitën e nenit 49 të ligjit të mund të përdoret edhe shkalla e reduktuar në masën prej 6% e aplikuar për të gjithë shërbimet e ndërtimit për investimet shtetërore dhe të klubeve, dhe infrastrukturën sportive.
Furnizuesit e punimeve të ndërtimit do llogaritin TVSH –në shitje me 6% për ndërtimin e infrastrukturave sportive dhe do zbresin të plotë TVSH-në e paguar prej 20% të mallrave dhe shërbimeve për këto punime ”
Komisioni i Ekonomisë ka diskutuar gjithashtu ndryshimet në ligjit për taksat vendore, i cili synon zerimin e tatim-fitmit të thjeshtuar për rreth 5300 biznese të vogla.
“Tatimpaguesit në fashën mbi 18 milionë lekë deri ën 14 milionë nuk do paguajnë më tatim-fitimin. Por krahas kësaj fashe të tatimpaguesve që u zerua me miratimin e ligjit është edhe një fashë tjetër që paguajnë tatimin e thjeshtëzuar mbi fitimin për llogari të pushtetit vendor.
Këta tatimpagues i përkasin fashës nga 5-8 milionë lekë qarkullim vjetor. Tatim aktual që ata paguajnë është 5% dhe me këtë projektligj në parashikojmë që të zerohet pagesa e tatim-fitimit për këtë kategori”
Ndërkaq, Ministria e Financave ka propozuar për herë të parë, që edhe objektet e dëmtuara nga tërmeti i 26 Nëntorit, që përdoren për veprimtari ekonomike, të përjashtohen nga taksa e ndikimit në infrasturkturë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.