Ulja e euroizimit në ekonomi – BSH kërkon marrjen e masave nga Ministria e Financave

Banka e Shqipërisë i ka kërkuar zyrtarisht Ministrisë së Financave dhe Ekonomisë të marrë masa për uljen e përdorimit të euros në ekonominë reale. Gjatë mbledhjes së Grupit Këshillimor të Stabilitetit Financiar, më datë 9 prill, një nga temat në tryezë ishte edhe strategjia e deeuroizimit. Palët diskutuan mbi nevojën për identifikimin e veprimeve që synojnë rritjen graduale të përdorimit të monedhës vendase në sektorin real të ekonomisë. Sipas njoftimit zyrtar, diskutimi evidentoi rëndësinë që ky hap paraqet për suksesin e objektivit mbi rritjen e përgjithshme të përdorimit të lekut në sistemin financiar dhe ekonominë shqiptare. Përfaqësuesit e Ministrisë së Financave dhe Ekonomisë u angazhuan ta trajtojnë me përparësi këtë çështje.

Mbështetur në memorandumin e nënshkruar një vit më parë, Banka e Shqipërisë, Ministria e Financave dhe Ekonomisë dhe Autoriteti i Mbikëqyrjes Financiare angazhoheshin të nxisnin përdorimin e monedhës kombëtare në sistemin financiar dhe në ekonominë shqiptare. Por, deri tani, vetëm banka qendrore ka marrë masa konkrete për këtë qëllim.

Banka e Shqipërisë dhe Fondi Monetar Ndërkombëtar e konsiderojnë të domosdoshme ndërhyrjen për të kufizuar përdorimin e panevojshëm të euros në transaksionet e brendshme ekonomike, me qëllim uljen e nivelit të euroizimit.

Masat e ndërmarra vitin e kaluar nga Banka e Shqipërisë deri tani kanë dhënë efekte të kufizuara. Kredia në euro gjatë vitit 2018 ka ngelur në nivele të përafërta me një vit më parë, por pozitiv është fakti se ka rënë pesha e kredisë në valutë të ekspozuar ndaj rrezikut të kursit. Ndërkohë, pesha e depozitave në valutë është rritur lehtë edhe për vitin e kaluar. Sidoqoftë, Banka e Shqipërisë e pati bërë të qartë qysh në fillim se masat e saj nuk kishin qëllim të sillnin përmbysje afatshkurtra, por një rritje graduale dhe afatgjatë të peshës së aktiveve dhe pasiveve në lekë në bilancet e bankave.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.