Ulja e konsumit të energjisë/ Certifikatat e “klasit” të energjisë në ndërtesa do mbikqyren sistematikisht

Çertifikatat e performancës së energjisë në ndërtesa do të mbikëqyren sistematikisht nga Agjencia për Eficencën e Energjisë në lidhje me vërtetësinë e të dhënave. Një Vendim i Këshillit të Ministrave saktëson në detaje hapat që do të ndiqen për verifikimet, duke synuar shmangien e të dhënave false në raportet e auditimit energjetik. Ndërkohë që, nëse gjatë procesit të verifikimit,një certifikatë për performancën e energjisë konstatohet me të dhëna të rreme dhe të pasakta, agjencia tërheq certifikatën si dhe vendos sanksione sipas parashikimeve ligjore.

Në korrik të këtij viti qeveria miratoi një nga vendimet, që i hap rrugën uljes së konsumit të energjisë në vend, ndërkohë që sipas dokumentit, kompanive të ndërtimit iu lindin detyrime të reja që duhet të përmbushin përpara se të pajisen me lejen e ndërtimit. Më konkretisht, aplikanti si pjesë të dokumentacionit tekniko-ligjor që paraqet pranë autoriteteve përkatëse, ku aplikohet për leje ndërtimi, paraqet edhe certifikatën paraprake për performancën e energjisë, të lëshuar nga Audituesi Energjetik i Certifikuar, së bashku me “Deklaratën e përgjegjësisë profesionale”. Nëpërmjet këtyre dokumenteve ai konfirmon dhe mban përgjegjësi për përputhshmërinë e projektit të propozuar me legjislacionin në fuqi që përcakton kërkesat minimale për perfomancën e energjisë së ndërtesave.

Por, objekti i ndërtuar nuk mund të pajiset me lejen e përdorimit, pa dorëzuar certikatën përfundimtare të performancës nëpërmjet së cilës ai konfirmon dhe mban përgjegjësi për përputhshmërinë e projektit të përfunduar me legjislacionin në fuqi që përcakton kërkesat minimale për perfomancën e energjisë së ndërtesave. Paralelisht, çdokush që do të shesë apo do të japë me qira një banesë duhet të pajiset me certifikatën e performancës së energjisë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.