Ulja e pragut të TVSH në 2 milionë lekë – Tatimet: Në fuqi nga 1 prilli. Ja si duhet të veprojnë bizneset e vogla
Drejtoria e Përgjithshme e Tatimeve ka publikuar të mërkurë një udhëzim për bizneset e vogla që preken nga ulja e pragut të TVSH. Duke filluar nga data 1 prill 2018 hyn në fuqi kufiri i regjistrimit në Tatimin mbi Vlerën e Shtuar prej 2 milionë lekësh.
Kjo do të thotë se tashmë në këtë përgjegjësi tatimore do të regjistrohet çdo tatimpagues, i cili gjatë vitit kalendarik 2017 ka realizuar një qarkullim mbi këtë shumë, si edhe çdo tatimpagues ekzistues apo i regjistruar rishtazi, i cili parashikon të realizojë një qarkullim mbi këtë kufi, gjatë vitit 2018.
Tatimpaguesit që i nënshtrohen në këtë mënyrë regjimit normal të TVSH-së kanë të drejtë që në muajin e parë kur bëhen të tatueshëm të njohin TVSH-në e zbritshme për mallrat e inventarit gjendje në datën e regjistrimit në këtë regjim, mallra këto me qëllim për t’u shitur, për të cilat do të llogarisë TVSH në shitje.
Për këtë arsye, tatimpaguesi duhet të përpilojë listën e mallrave stok sipas sasisë dhe vlerës, bashkë me datën e regjistrimit të stoqeve. Ky inventar duhet të dorëzohet në drejtorinë rajonale, në momentin që bëhet regjistrimi në regjimin normal të TVSH-së.
Për të përfituar nga kjo zbritje është e nevojshme që lista të jetë e justifikuar me faturë tatimore të blerjes me TVSH, i blerë jo më parë se 12 muaj.
Është e nevojshme gjithashtu që tatimpaguesit që regjistrohen për herë të parë për TVSH-në, kë komunikojnë me shoqërinë e pajisjes fiskale për të bërë ndryshimin e shkallës tatimore, me qëllim të lëshimit të kuponit tatimor me TVSH që nga data 1 prill.
Për transaksionet me vlera mbi 40 mijë lekë, ose kur blerësi kërkon vetë një faturë tatimore prej shitësit, është e nevojshme pajisja nga ana e tatimpaguesit me blloqet e faturave tatimore me TVSH, pranë drejtorisë rajonale tatimore.
Për tatimpaguesit e regjistruar për Tatimin e Thjeshtuar të Fitimit me qarkullim vjetor nga 2 000 000 – 5 000 000 lekë librat dorëzohen elektronikisht çdo tre muaj, jo më vonë se data 10 e muajit pasardhës të tremujorit që ato i takojnë.
Konkretisht, deklarimi librave të shitjes e blerjes, të mbajtura për muajin prill, maj dhe qershor 2018, nga tatimpaguesit e regjistruar prej datës 1 prill 2018, duhet të bëhet brenda datës 10 korrik 2018.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.