Ulja e TVSH për hotelet – Drafti në Kuvend, të hënën nisin diskutimet në komisione
Vitet e fundit sektori i turizmit ka pasur një vëmendje të veçantë nga ana e qeverisë shqiptare, si një nga sektorët prioritarë në zhvillimin ekonomik të vendit. Synohej vendosja e Shqipërisë si një destinacion i preferuar në ofertën mesdhetare të tregjeve ndërkombëtare të turizmit, duke krijuar një imazh të ri për Shqipërinë turistike dhe duke ofruar shërbim në përputhje me standardet ndërkombëtare.
Kështu vendimi i qeverisë për uljen e TVSH për hotelet ka mbërritur në Kuvend ku do të nisë diskutimet në Komisionet parlamentare. Të dhënat mbi numrin e vizitorëve këto katër vitet e fundit (2013 – 2016) kanë treguar se jemi në rrugën e duhur. Nga viti 2013 në vitin 2016 ka pasur një rritje prej 45,4 % të numrit të shtetasve të huaj të hyrë në vendin tonë.
Për këtë arsye, me qëllim incentivimin e këtij sektori, ulja e barrës fiskale vetëm për akomodimin në strukturat akomoduese, sipas përcaktimeve të legjislacionit në fushën e turizmit, do të sjellë efekte pozitive, konkretisht, përmirësimin e shërbimit dhe të cilësisë, do të nxisë rritjen e numrit të turistëve, krijimin e vendeve të reja të punës etj. Ky projektligj ka impakt negativ në të ardhurat e buxhetit të shtetit, në zërin “Të ardhura nga TVSH-ja, por që pritet të sjellë një impakt pozitiv dhe rritjen në të ardhura nga zhvillimi i sektorit të turizmit.
Për shkak se në sektorin e turizmit përfshihen një sërë shërbimesh, përveç akomodimit në hotel, p.sh. restorante apo shërbime të tjera argëtimi, llogaritja e efekteve është bërë më përafërsi. Nga përllogaritjet, duke marrë parasysh TVSH-në e mbledhur nga sektori i turizmit për vitin 2016, efekti negativ në buxhet do të jetë me përafërsi rreth 1,1 miliardë lekë.
Sipas statistikave të Shoqatës së Hotelierëve, nga ky vendim do të përfitojnë 3900 njësi akomodimi, ku përfshihen hotele, motele dhe shtëpi akomoduese. Aktualisht në gjithë vendin funksionon një kapacitet prej 60 mijë shtretër.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.