Ulja e TVSH-së dhe e taksave – Basha premton nga Berati për fuqizim të ekonomisë
Ulja e TVSH-së, ulja e taksave si dhe investimet në bujqësi këto janë premtimet që ka bërë kreu i opozitës Lulzim Basha në Berat. Në hapjen e fushatës nga Partia Demokratike në këtë qytet, Basha ka premtuar se do të këtë kryefjalë të qeverisjes së tij rritjen ekonomike të vendit.
“Plani im ekonomik ka vulën e ekspertëve ekonomikë të Angela Merkel, partisë Kristian Demokrate që na ka ndihmuar me ekspertët e tyre më të mirë, me një plan të fuqishëm ekonomik që do të kërkojë vendime të qarta, vendime të forta, vendime të prera. Vendimi i parë do të jetë ulja e taksave. Ulja e TVSH dhe e taksave do të çlirojë miliona euro në ekonominë shqiptare që do të përkthehen në vende pune, në biznese të reja, në rritje të fuqisë blerëse, me më shumë qarkullim të parasë. Leku nuk do të jetë më në xhepin e 4-5 njerëzve por do të kthehet përmes zinxhirit ekonomik në xhepat e sipërmarrësve, të punësuarve, konsumatorëve, pra qytetareve”.
Më tej Basha ka premtuar për paga më të larta si dhe rritje të pensionit minimal në fund të katër viteve në vlerën e 25 mijë lekëve.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.