“Ulni tarifat përmbarimore”, FMN: Pengojnë rënien e kredive me probleme
Tarifat e larta përmbarimore mund të pengojnë procesin e ekzekutimit të kolateralit dhe të ngadalësojnë uljen e raportit të kredive me probleme.
Në deklaratën përmbyllëse të misionit të radhës në Shqipëri, Fondi Monetar Ndërkombëtar ka kërkuar shprehimisht anulimin e udhëzimit të fundit të dalë nga Ministri i Drejtësisë dhe ai i Financave.
Ky udhëzim solli rritje të lartë të tarifave të shërbimit përmbarimor dhe u kundërshtuar ashpër nga Shoqata Shqiptare e Bankave. Raporti i kredive me probleme më në fund ndodhet në një rrugë të qëndrueshme uljeje.
Guvernatori i Bankës së Shqipërisë, Gent Sejko, tha se ky tregues për gushtin zbriti në 15.1%, niveli më i ulët në gjashtë vitet e fundit.
“Masat e marra për reduktimin e kredive me probleme kanë bërë që raporti i tyre ndaj kredisë totale të zbresë në 15.14% në muajin gusht, niveli më i ulët ky i shënuar që prej vitit 2011. Treguesi i kredive me probleme është në rënie për pothuajse të gjitha bankat e sistemit dhe reflekton jo vetëm detyrimin rregullator për fshirjen e tyre, por edhe shlyerjen e kredive nga sektori privat. Përmirësimi i bilanceve të sistemit bankar, reduktimi i perceptuar i rrezikut të kreditit si dhe përmirësimet e mëtejshme të klimës së biznesit, pritet të ndikojnë në një ofertë më të mirë të kredisë bankare në afatin e mesëm. Së bashku me gjallërimin e pritur të kërkesës për kredi, këto zhvillime pritet të pasqyrohen në një rritje më të shpejtë të kreditimit në të ardhmen”.
Guvernatori nënvizoi se ulja e kredive me probleme përbën një parakusht të rëndësishëm në lehtësimin e kushteve të huadhënies dhe në zgjerimin e ofertës për kredi.
Pengesat në këtë proces, siç mund të jenë tarifat e larta përmbarimore, rrjedhimisht mund të dëmtojnë rritjen e kreditimit dhe rimëkëmbjen e mëtejshme të ekonomisë shqiptare.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.