Unaza e Mesme e Tiranës – Ndërhyrje masive në 6 kryqëzimet kryesore, synohet reduktim i trafikut
Unaza e Mesme e Tiranës, në të cilën aktualisht kalon autobusi i unazës, do t’i nënshtrohet një rikualifikimi total. Bashkia e Tiranës në buxhetin afatmesëm 2018-2020, sa i përket programit të shërbimeve publike vendore, parashikon një projekt me vlerë totale 302 milion lekë për ndërhyrje në unazën e mesme të Tiranës.
Qëllimi i projektit është risistemimi i rrugës, me të gjithë elementët e infrastrukturës rrugore, me qëllim përmirësimin e cilësisë së jetës së komunitetit të kësaj zone dhe ndërhyrjen në gjashtë kryqëzime të cilat japin zgjidhjen për lehtësimin e trafikut.
Konkretisht, ndërhyrjet në infrastrukturën rrugore konsistojnë në këto kryqëzime:
Kryqëzimi i rrugës ”Muhamet Gjollesha” me rrugën ”Myslym Shyri”;
Kryqëzimi i rrugës ”Jordan Misja” me rrugën ”Asim Vokshi”;
Kryqëzimi i rrugës ”Siri Kodra” me rrugën ”Ferit Xhajko”;
Kryqëzimi i rrugës ”5 Maj” me rrugën ”Ferit Xhajko”;
Kryqëzimi i rrugës ”Kongresi Manastirit” me rrugën ”Bardhyl”;
Kryqëzimi i rrugës ”Arkitekt Kasemi” me Bulevardin ”Zhan D’Ark”;
Rehabilitimi i Blv.”Bajram Curri” në segmentin nga kryqëzimi me Blv.”Dëshmorët e Kombit” deri në kryqëzimin me rrugën ”Elbasanit”.
Reabilitimi i korsive BUS në Blv “Bajram Curri”, Blv “Gjergj Fishta” dhe Blv “Zhan D’Ark”;
Realizimi i korsive të biçikletave në Blv. Zhan D’Ark dhe Blv “Gjergj Fishta” (në krah të lumit Lana) me gjerësi 2.5 m me dy drejtime.
Në kryqëzime do të ketë prishje dhe spostime të trafikndarësve ekzistues, heqje të parkimeve ekzistuese dhe prishje të trotuareve. Objekti ka një gjatësi totale 7.4 km dhe gjerësi të trupit të rrugës nga 20 m deri në 24 m.
Në rrugë është i pranishëm rrjeti i kanalizimeve të ujërave të zeza, të bardha, rrjeti i ujësjellësit dhe ndriçimi rrugor. Duke marrë në konsideratë gjendjen aktuale shihet e arsyeshme shtimi i korsisë së automjeteve sipas orientimi përkatës.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.