UNICEF i bën thirrje G7 / Të dhurojë vaksinat tek COVAX. India ka tkurrur furnizimet në botë
Fondi i Emergjencave për Fëmijët i Kombeve të Bashkuara, UNICEF, i kërkoi vendeve të G7 që të dhurojnë furnizime të vaksinave tek skema COVAX, si masë emergjencë për të trajtuar mungesën e shkaktuar nga ndërprerja e eksporteve indiane. India, ka kufizuar eksportet e vaksinës së AstraZeneca, të prodhuar brenda vendit, që ishte premtuar për skemën COVAX, për shkak të valës së dytë vdekjeprurëse në vend. UNICEF, që është ngarkuar me dorëzimin e vaksinave përmes COVAX, vlerëson se mungesa prej Indisë mund të arrijë në 140 milionë deri në fund të Majit dhe në 190 milionë deri në Qershor. “Ndarja e menjëhershme e dozave të tepërta është një masë emergjente dhe jetësore”- tha shefja e agjencisë, Henrietta Fore, duke shtuar se kjo mund të parandalojë vatra të ardhshme botërore të virusit. Ndërkohë që liderët e 7 vendeve më të pasura G7 takohen në Britani muajin e ardhshëm, OBSH ka kritikuar pabarazinë e vaksinave, duke e quajtur një “katastrofë morale” dhe i bërë thirrje vendeve që të dhurojnë doza. Duke përmendur të dhëna të kompanisë së analitikës, Airfinity, shefja e UNICEF, tha se vendet e G7 mund të dhurojnë rreth 153 milionë doza nëse ndajnë vetëm 20% të furnizimeve të disponueshme për Qershorin, Korrikun dhe Gushtin. Sipas saj, kjo mund të bëhet duke u përputhur me objektivat e vaksinimit të popullsive.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.