UniCredit, interes për Commerzbank – Do të krijonte një nga huadhënësit më të mëdhenj në Europë

Banka më e madhe në Itali, UniCredit, ka shfaqur së fundmi interes në shkrirjen me bankën gjermane Commerzbank, sipas burimeve të Reuters, gjë që do të krijojë një nga bankat më të mëdha në Europë.

Shprehja e interesit nga Unicredit drejt qeverisë gjermane, që zotëron 15% të aksioneve të Commerzbank pas shpëtimit gjatë krizës financiare, tregon iniciativën për një nga shkrirjet më të mëdha përtej kufijve në Europë.

Aksionet e Commerzbank u rritën me 3% në bursën e Frankfurtit, ndërsa Unicredit ra me rreth 3%. Një serë pengesash, përfshirë dyshime nga Gjermania për të dorëzuar një nga huadhënësit kryesorë drejt një blerësi të huaj, do të duhet të kapërcehen përpara se të arrihet një marrëveshje.

Grupi financiar me seli në Milano shihet si një nga kandidatët kryesor për Commerzbank, që gjeneron thuajse gjysmën e të ardhurave nga kredi dhe shërbime financiare drejt firmave të mesme në Gjermani (Mittelstand).

Ekzekutivët kryesorë të Commerzbank dhe rivalit më të madh Detusche Bank, kanë pasur bisedime të pasuksesshme për një kombinim vitin e kaluar.  UniCredit, me një vlerë në treg prej rreth 40 miliardë eurosh, është 3 herë më e madhe se Commerzbank.

Një kombinim do të krijonte një nga huadhënësit më të madh në Europë dhe përmbushë kërkesat e Bankës Qendrore Europiane për konsolidimin bankar.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.