UniCredit thyen projeksionet – Të ardhura më të forta nga tarifat dhe komisionet në T2
Banka më e madhe në Itali, UniCredit, raportoi një fitim neto sipër projeksioneve për tremujorin e dytë, falë të ardhurave më të mëdha nga tarifat dhe komisionet. Kreu ekzekutiv, Jean-Pierre Mustier tha se një mjedis ekonomik më optimist në Europë ka ndihmuar në rezultatet e bankës.
Ai shtoi se kostot e ulëta dhe të ardhurat e qëndrueshme nga interesat neto kanë kontribuar gjithashtu në performancën e fortë. Huadhënësi, që ka operacione në 17 vende, kryesisht në Europë, raportoi një fitim neto prej 945 milionë euro, sipër projeksioneve prej 670 milionë. UniCredit raportoi gjithashtu një rënie më të ulët se ç’pritej në të ardhurat nga tregtimi.
Huadhënësi, që përfundoi këtë vit një injeksion të kapitalit prej 13 miliardë euro, ka fuqizuar normën e kapitalit bazë kundrejt aktiveve të ponderuara me risk në 12.8% në tremujorin e dytë. Kjo normë, që është rritur nga 11.45% që ishte në tremujorin e parë, është më e forta në Itali. Analistët thonë se aksionet e bankës pritet të rriten, prej të ardhurave të qëndrueshme si dhe përmirësimit të cilësisë së aktiveve.
Kreu ekzekutiv i caktuar vitin e kaluar, ka shitur asete të bankës, përfshirë firmën e menaxhimit të aktiveve Pioneer, ka mbyllur degë dhe shitur kredi të këqija, për të fuqizuar bilancin e bankës. Banka përfundoi një marrëveshje muajin e kaluar për të shitur 17.7 miliardë euro kredi të këqija (sofferenze), ndaj një mekanizmi të zotëruar nga fonde amerikane (Pimco, Fortress). Të ardhurat neto nga tarifat dhe komisionet u rritën në 7.6% me bazë vjetore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.