Uniformat blu në “sitë” – Do verifikohen pastërtia e figurës, pasuria dhe aftësitë profesionale

Sita e “Vettingut” në radhët e efektivëve të policisë dhe punonjësve do të fokusohet në verifikimin e pastërtisë së figurës, pasurisë dhe aftësive profesionale të uniformave blu. Kryesisht këtij procesi do t’i nënshtrohen punonjësit e  Policisë së Shtetit, Gardës së Republikës dhe Shërbimit të Çështjeve të Brendshme dhe Ankesave në Ministrinë e Brendshme.

Vetëm pak ditë më parë ministri i Brendshëm Fatmir Xhafaj urdhëroi që të ngrihet një grup pune, i cili do të kryesohet nga zv.ministri i Brendshëm dhe do të asistohet nga misionet e asistencës së BE nëpërmjet Pameca V dhe SHBA nëpërmjet ICITAP, si dhe nga ana e ekspertëve të mirënjohur ndërkombëtarë, për një proces teknik sa më transparent.

Ky proces shënon një nga prioritetet e punës së Ministrisë së Brendshme, që është rritja e besimit të qytetarëve në organet e rendit ndërkohë që  pritet që brenda dhjetorit të përgatitet i gjithë terreni për veting-un në radhët e uniformave blu.

Në bazë të urdhërit të ministrit të brendshëm, vettingut do t’i nënshtrohen të gjithë punonjësit e strukturave pa përjashtim, në të gjitha nivelet, nga drejtuesi më i lartë deri te specialisti më i thjeshtë. Por përpara se të realizohet procesi i vettingut sipas urdhrit të ministrisë, grupi i punës do të organizojë një proces konsultimi me ekspertë dhe pedagogë të fushës.

Ndërkaq ministri përmes urdhrit ka deklaruar që pas konsultimit, në mbështetje të grupit të punës do të ngrihet i ashtuquajturi sekretariati teknik që do të merret me zbatimin e këtij urdhri. Ky sekretariat do të përbëhet nga përfaqësues apo specialistë të Drejtorisë së Përgjithshme të Planifikimit Strategjik dhe Integrimit në Ministrinë e Brendshme; Drejtorisë së Përgjithshme të Antitrafikut dhe Azilit; Shërbimit të Çështjeve të Brendshme dhe Ankesave në Ministrinë e Brendshme; Drejtorisë së Studimeve Strategjike në Drejtorinë e Përgjithshme të Policisë si edhe  Drejtorisë së Burimeve Njerëzore në Drejtorinë e Përgjithshme të Policisë së Shtetit.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.