Universitetet hapin dyert më 18 Tetor – Rektori i UT, Hoxha: 50% e studentëve janë vaksinuar, pranohen edhe ata me një dozë

Më 18 Tetor të gjitha universitetet në vend do të hapin dyert për studentët për vitin akademik 2021-2022, për të gjitha ciklet e arsimit, ndërsa viti i parë master në Universitetin e Tiranës, do të nisë më 10 nëntor. Rektori i Universitetit të Tiranës Artan Hoxha, bëri me dije se deri më tani janë vaksinuar 50 për qind e studentëve dhe sqaroi se si do të funksionojë pjesëmarrja në auditore për pjesën tjetër.

“Janë vaksinuar rreth 50% e studentëve në Universitetin e Tiranës. Do të pranohen dhe studentët që kanë kryer vetëm një dozë. Çdo cikël studimi do të vijojë mësimin më 18 tetor, ndërsa masteri i vitit të parë, do të nisë më 10 nëntor. Universiteti i Tiranës është ai që ka numrin më të madh të studentëve. Ne jemi në procesin e ndërgjegjësimit të nevojës për vaksinim dhe për të vazhduar mësimin në kushtet normale. Ka 2 vite e ca që studentët tanë nuk frekuentojnë auditoret. Mësimi online, edhe pse është përmirësuar në mënyrë cilësore dhe komunikimi student-pedagog ka qenë i mirë, gjithsesi ky lloj komunikimi, nuk është ai normali, kështu që ajo që kemi konstatuar është dhe një dëshirë, padurim që studentët t’i kthehen auditorit. Studentët që vijnë për herë të parë në universitet janë më të vaksinuarit.”

Rektori theksoi se është vendosur një pjesë e mirë e programeve të zhvillohen në gjuhën angleze.

“Një pjesë e mirë e programeve tona, për një pjesë të studentëve do të zhvillohet në gjuhë të huaj dhe ajo do të jetë anglisht, me qëllim që ne të kemi mundësi që një pjesë të studentëve të përgatisim me programet në gjuhë të huaj, që të kemi mundësi që modelitete të studentëve që kemi më tepër nga brenda jashtë, pra studentë që shkojnë jashtë, kështu do të kemi mundësi që studentë të huaj të ndjekin studimet te ne”.

Viti i ri akademik ishte parashikuar të niste më 11 Tetor, por u shty për tiu dhënë mundësi studentëve që të vaksinohen, si detyrim për të marrë pjesë në auditore.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.