“Universitetet italiane të zgjedhin Shqipërinë” – Rama në Puglia, kërkon investime në arsim dhe turistë
Kryeministri Edi Rama ka bërë apel për shtrirje të universiteteve italiane në vendin tonë, duke qenë se shumë të rinj shqiptarë zgjedhin të studiojnë në vendin fqinj për shkak të cilësisë së lartë në arsimim. Çështja e arsimit ishte një nga temat e diskutimit midis kryeministrit dhe presidentit të Rajonit të Puglias Michele Emiliano, gjatë vizitës në këtë rajon.
Kryeministri u ndal edhe në sektorin e turizmit, ku bëri me dije dhe planet për hapjen e aeroportit të Vlorës si mundësi e mirë per turistët italianë dhe emigrantët shqiptarë që jetojnë atje.
Kryeministri Edi Rama ndodhet në Itali dhe mbrëmjen e së premtes mori pjesë në një ceremoni përkujtimore në Otranto, me një fjalim pranë skulpturës “Katëri i Radës”. Rama u prit nga Kryetari i Bashkisë së Otrantos për të cilin ndau falënderime për mikpritjen që iu bë shqiptarëve në fillim të viteve 90-të.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.