Ursula von der Leyen ashpërson tonin me AstraZeneca / I kërkon të respektojë kontratën përndryshe do të bllokojë eksportet
Liderët e Bashkimit Evropian ranë dakord në një samit që të shpejtojnë prodhimin e vaksinave të Covid-19 në Evropë si dhe të përmirësojnë programet e imunizimit në vendet anëtare, sipas presidentit të Këshillit, Charles Michel. Shefja e Komisionit, Ursula von der Leyen, tha në një konferencë pas samitit se vaksinimi po merr vrull dhe blloku do të arrijë objektivin e vaksinimit të 70% të të rriturve në tremujorin e dytë. Von der Leyen shprehu shqetësime mbi mungesën e madhe të dërgesave kontraktore me AstraZeneca, ndërkohë që vala e tretë po godet kontinentin. Ndërkohë që programet e vaksinimit janë mbrapa atyre të Britanisë apo Shteteve të Bashkuara, von der Leyen paralajmëroi se eksportet e vaksinave nga kompania britanike do të bllokohen deri sa të dërgohen dozat e premtuara tek Bashkimi Evropian.
Prej 300 milionë dozave që duhet të dërgohen në BE deri në fund të Qershorit, AstraZeneca synon të ofrojë vetëm 100 milionë. Më herët gjatë Javës, Komisioni Evropian shpalosi planet për të shtrënguar mbikëqyrjen e eksportit të vaksinave. Kjo do të ofrojë më shumë fuqi që të bllokohen dërgesat ndaj vendeve që kanë normë të lartë të vaksinimit.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.