Ushqimi në shkollat shqiptare, “Menuja” e mbingopur me kalori – Shkolla 22 ditë në muaj, prindërit paguajnë për 30
Këshilli i Ministrave, me propozim të Ministrisë së Arsimit, Sportit dhe Rinisë ka miratuar në mbledhjen e fundit kushtet për përfitimin e bursave për nxënësit që do të ushqehen në shkollat 9-vjeçare dhe të mesme.
Pagesa mujore për nxënës do të jetë 6655 lekë në muaj, kosto e cila në raste të veçanta do të financohet plotësisht ose pjesërisht nga shtetit.
Ndërkohë, në tabelat bashkëlidhur vendimit, qeveria ka bërë publike edhe dietën që do të ndiqet për ushqimin e nxënësve. Nga figura e mëposhtme, rezulton se ushqimi i një nxënësi do të ketë një vlerë ditore prej 215.5 lekësh, e cila llogaritur me 22 ditët kur nxënësit shkojnë në shkollë, mblidhet në një total prej 4741 lekësh.
Pra në fakt, sipas tabelës, prindërit do të paguajnë më shumë nga sa fëmija i tyre do të konsumojë në shkolla.
Në shënimin që i bashkangjitet tabelës, thuhet se është e domosdoshme që nxënësi të marrë kuotën ditore në kalori, të cilat mblidhet për një total ditor prej 2712 kcal.
Por, sipas rekomandimeve të mjekëve për sasinë e kalorive që duhet të konsumojë një fëmijë, një normë e tillë nuk jepet derisa fëmija të ketë së paku moshën 14 vjeç. Edhe në këto raste, kjo normë kalorish është e nevojshme vetëm kur ata kanë aktivitet të lartë fizik, pra që ushtrojnë veprimtari sportive për një sasi të konsiderueshme kohore në ditë.
Norma e kalorive duket edhe më lartë në çastin që llogarisim se nxënësit do të konsumojnë vetëm 1 ose 2 vakte në ditë në shkollë. Kjo mund të rezultojë problematike në të ardhmen, duke kontribuar në rritjen e obezitetit tek fëmijët.
Sa i takon ingreditentëve të menusë, gramaturat janë pasqyruar për efekt planifikimi, çka do të thotë se nuk do të shërbehen të gjithë në një ditë, por do të serviren me rotacion.
Mes përbërësve, bie në sy konsumi i lartë i bukës, 350-400 gramë për nxënës, si edhe mungesa e një produkti tjetër që do të zëvendësojë qumështin për ata fëmijë që nuk e konsumojnë apo janë laktoz intolerantë.
Megjithatë, në shënim thuhet se lloji i ushqimit dhe gramaturat mund të ndryshojnë sipas menyve të ndryshme, sipas çmimeve që ofrohen nga konkurrenca e në procesin e prokurimeve publike dhe ndikimit të faktorëve të tjerë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.