Vaksina e gripit – Bie numri i shitjeve në farmaci, por jo interesimi për të
Në farmacitë e Tiranës ka rënë numri i shitjes së vaksinave të gripit por jo interesimi për kryerjen e kësaj vaksine. Sipas farmacistëve këtë vit qytetarët i janë drejtuar më shumë qendrave shëndetësore për të kryer vaksinën. Grupmoshat më të interesuara për blerjen e vaksinës janë 40-60 vjeç. Vaksina e gripit këshillohet që të bëhet në kategoritë që janë më të rriskuara ndaj gripit.
“Ka një rënie momentalisht të shitjes së vaksinave të gripit. Periudha maksimale e shitjes është nga Tetori – Nëntori, po them. Megjithatë, sivjet ka një rënie të shitjes sepse shumica e popullsisë kanë vajtur nëpër qendra shëndetësore dhe i bëjnë falas. Interesim ka, por që ka një rënie të shitjes në farmaci.”
“Këtë vit ka rënë pak fluksi, duke qenë se doli se mund të bëhet edhe falas vaksina e gripit. Kryesisht moshat e vogla, fëmijët dhe moshat e mëdha janë të interesuara për të bërë vaksinën e gripit.”
Qytetarët ende nuk janë të “mësuar” me faktin që duhet të vaksinohen. Por ka edhe nga ata që i drejtohen farmacisë për të blerë edhe në këtë periudhë vaksinën. Sipas ekspertëve çdo individ mund të vaksinohet edhe gjatë sezonit të gripit , mjafton që ai vetë të mos jetë prekur nga gripi.
“Ta provojmë edhe me vaksinën se këto të tjerat i kemi provuar. Kështu që, mbase vaksina është më e mira nga këto medikamentet e tjera.”
“Nuk na zë. Me ato ilaçet që pimë ne, s’na zë fare. Vaksinën nuk e kemi bërë, mos të gënjej.”
“Jo, nuk më ka zënë gripi.”
Gazetarja: Vaksinoheni rregullisht: “Jo, nuk vaksinohem.”
Gazetarja: Besoni tek vaksina? “Përderisa tregtohet nga shteti dhe është e kontrolluar, pse mos besojmë?”
Gazetarja: Po ju, pse nuk e përdorni? “Besoj se kam imunitet dhe nuk më nevojitet.”
Tetori dhe nëntori janë përcaktuar si dy muajt që kanë fluksin më të lartë të shitjeve të vaksinave në farmaci. Çmimi i një vaksine në farmaci varion nga 820 lekë në 900 lekë.
“Periudha më e shpeshtë që janë shitur vaksinat ka qenë periudha Tetor – Nëntor. Ndërkohë, që periudha që mund të bëhet një rivaksinim te periudha Mars – Prill. Çmimet që variojnë janë diku te 900 lekë të reja. Ne kemi aktualisht, por që nuk është që interesohen shumë, do me thënë për blerjen e tyre.”
Shteti shqiptar ka siguruar rreth 100 mijë doza të vaksinës së gripit. Kjo vaksinë është e shpërndarë në të gjitha qendrat shëndetësore dhe rreth ¾ e saj janë përdorur sipas burimeve zyrtare nga ISHP. Kategoritë që përfitojnë falas vaksinën e gripit janë personeli shëndetësor, të sëmurët kronik, gratë shtatzëna si dhe personat e moshës së tretë.
“Mund të them që ka pasur një ecuri shumë të mirë të administrimit të kësaj vaksine. Është kryer pothuajse ¾ e sasisë së vaksinës dhe mund të them që akoma ka një sasi. Kështu që, persona të cilët i përkasin kategorive që u përmendën më sipër mund të shkojnë dhe të vaksinohen në çdo kohë.”
Çdo person që i përket njërës prej kategorive të përmendura më lart dhe nuk është vaksinuar mund ti drejtohet qendrës shëndetësore. Vaksina që ofrohet falas nuk është për fëmijët. Prej saj mund të përfitojnë të gjitha kategoritë e listuar më lartë ndërsa për fëmijët nga mosha tre vjeç e lartë këshillohet që kjo vaksinë të blihet.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.