Vaksina e Oksfordit, e sigurtë. AstraZeneca: “Nxit reagim imunitar tek të moshuarit dhe të rinjtë”
Vaksina e Covid-19 që po zhvillohet nga Universiteti i Oksfordit, nxit reagim të fortë imunitar tek të rriturit, të moshuar dhe të rinj, ndërkohë që efektet anësore ishin më të ulëta tek mosha e tretë, sipas firmës britanike, AstraZeneca. Vaksina shihet si mjeti i vetëm në betejën kundë koronavirusit deri më tani. “Imunogjeniteti ishte i ngjashëm mes të moshuarve dhe të rinjve, ndërsa efektet anësore ishin më të ulëta tek të moshuarit”, – sipas AstraZeneca për Reuters.
Lajmi i reagimit imunitar tek të moshuarit është pozitiv, për shkak se ata ndodhen në rrezikun më të lartë të vdekjes nga virusi. Vaksina e Oksfordit me AstraZeneca pritet të jetë një nga të parat që të marrë miratim rregullator, së bashku me Pfizer dhe BioNTech. E përditshmja britanike, Financial Times, raportoi se vaksina gjeneron “reagim të fortë imunitar” tek një grup i të rriturve të shëndetshëm në moshën 18-55 vjeç. Megjithatë, testet positive të imunogjenitetit nuk garantojnë se vaksina do të jetë plotësisht e sigurtë tek të moshuarit.
Vaksina e quajtur AZD1222, një nga kandidatët kryesorë në botë të koronavirusit, është zhvilluar nga shkencëtarët e Universitetit të Oksfordit dhe licensuar tek AstraZeneca në muajin Prill. Firma britanike rinisi provat në SHBA të vaksinës eksperimentale pas miratimit nga rregullatorët amerikanë. Kjo është një vaksinë me vektorë viralë, që përdor një version të butë të një virusi të gripit tek shimpanzetë , që kodon udhëzime për prodhimin e proteinave nga koronavirusi i ri, për të ndërtuar imunitet kundër Covid-19.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.