Vaksina në BE, një “dritare e shpresës”. Shumë vende nisin vaksinimin e grupeve të prioritetit

Hungaria dhe Sllovakia i lanë pas homologët europianë, ndërkohë që nisën vaksinimn që të Shtunën, 1 ditë përpara shpërndarjes në vende të tjera, përfshirë Francën dhe Spanjën. Në Gjermani, një numër i vogël i njerëzve në azile u injektuan me vaksinën gjithashtu, përpara nisjes zyrtare të fushatës. Vaksinimi në masë i Bashkimit Europian, që mban mbi 450 milionë banorë, do jetë i rëndësishëm në luftën kudnër pandemisë, që ka lënë mbi 1.7 milionë njerëz të vdekur në të gjithë botën dhe ka pllakosur ekonomitë dhe vendet e punës.

Hungaria administroi vaksinën e zhvilluar nga Pfizer dhe BioNTech te punonjësit e shëndetësisë në Budapest, pasi mori dozën për 4,875 persona.  E para që mori vaksinën ishte Adrienne Kertesz, një mjeke tek spitali Del-Pest.  Në Sllovaki, Vladimir Krcmery, specialist i sëmundjeve infektive dhe anëtar i komisionit të pandemisë tek Qeveria, ishte personi i parë që mori vaksinën, ndjekur nga kolegët e tij. Vende të tjera përfshirë Francën, Gjermaninë, Italinë, Asutrinë, Portugalinë dhe Spanjën, ndoqën me vaksinimin e grupeve të prioritetit.

Shpërndarja e vaksinës së Pfizer me BioNTech, që u preznatua për herë të parë në Britani më herët gjatë muajit, përmban sfida të mëdha. Vaksina përmban teknologjinë e re gjenetike të lajmëtarit të Acidit Ribonukleik (ARN), që nënkupton se duhet të ruhet në temperature super të ulëta prej -70 gradë Celsius.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.