Vaksina përforcuese e J&J ndaj Omicron – Studimi në Afrikën e Jugut, është 84% efektive në mbrojtjen kundër shtrimit në spital
Një vaksinë përforcuese e Johnson & Johnson COVID-19 është 84% efektive në mbrojtjen kundër shtrimit në spital nga varianti Omicron për 1-2 muaj pas marrjes së saj, tha kreu i Këshillit të Kërkimeve Mjeksore të Afrikës së Jugut, Glenda Grey.
Ajo prezantoi gjetjet e një studimi në një konferencë të Ministrisë së Shëndetësisë së Afrikës së Jugut mbi valën e katërt COVID-19, që është nxitur nga varianti i ri.
Studimi përfshiu 477,234 punonjës të kujdesit shëndetësor, të gjithë të vaksinuar me vaksinën J&J, prej të cilëve 236,000, ose afërsisht gjysma, kishin marrë vaksinën përforcuese të kësaj kompanie.
Studimi shqyrtoi shtrimet në spital në mesin e atyre punonjësve të kujdesit shëndetësor që ishin infektuar gjatë valës së katërt dhe zbuloi se injektimi përforcues uli shtrimet në spital me 63% në dy javët e para pas përforcuesit, duke shkuar deri në 84% më pas për një deri në dy muaj. “Kjo është prova e parë në botë e efektivitetit të vaksinës (kundër Omicron) duke përdorur vaksinën J&J”, tha Grey.
Autoritetet e Afrikës së Jugut kanë mbajtur deri tani një preferencë për vaksinën Pfizer, duke administruar 21 milionë doza, tre herë më shumë se rreth 7 milionë doza të vaksinës J&J. Por injeksioni J&J konsiderohet logjistikisht shumë më i preferueshëm, sepse është një regjim me dozë të vetme, i cili është më i lehtë për t’u administruar në zonat e largëta rurale, ku ndjekja mund të jetë e vështirë.
Të dhënat mbështesin prova tashmë të forta globale që Omicron mund t’i shmanget mbrojtjes së vaksinës kur bëhet fjalë për infeksionin fillestar. Midis pjesëmarrësve në studim, kishte rreth 30,000 infeksione të reja gjatë valës Omicron, krahasuar me vetëm rreth 11,000 secili në valët e mëparshme të nxitura nga variantet Delta dhe Beta.
Studimi theksoi gjithashtu se të infektuarit me SIDA ishin më të prekshëm për t’u shtruar në spital me Omicron. Prevalenca e SIDA-s në Afrikën e Jugut është rreth 13%.
Një studim i veçantë nga Instituti Kombëtar për Sëmundjet Transmetuese të Afrikës së Jugut (NICD) sugjeroi se Omicron mund të jetë duke shkaktuar sëmundje më pak të rënda se variantet e mëparshme, madje edhe te njerëzit e pavaksinuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.