Vaksinat kineze, mbërrijnë në Brazil / Turkish Airlines: Dërgesa zhvillohet me sukses, nga magazinat “smart” në Stamboll
Turkish Airlines deklaroi se ka ndërmarrë me sukses dërgesën e parë të vaksinës kineze të Sinovac në San Paulo, Brazil. Vaksinat u transportuan fillimisht në Stamboll, nga Pekini, dhe janë mbajtur atje në magazine smart, me temperaturë të kontrolluar, që janë projektuar për dërgesa të ftohta.
Shtatë kontejnerë me temperaturë të kontrolluar që mbanin vaksina janë dërguar në San Paulo këtë javë, që është një distancë fluturimi prej rreth 17 mijë kilometra nga Kina. Dërgesa kishte një peshë prej 3 tonë me kontejnerët. Më herët gjatë javës, Brazili deklaroi se do nisë importimin e 46 milionë dozave të para të vaksinës kineze të Sinovac.
Drejtori i institutit Butantan, Dimas Covas, tha në një seancë në kongres këtë javë se institute pret 46 milionë doza gati në Janar, që do përdoren nëse miratohen nga rregullatori shtetëror. Butantan po organizon provat e fazës së 3 të vaksinës në Brazil dhe Covas thotë se rezultatet fillestare tregojnë për një profil të mirë të sigurisë. Brazili ka numrin e tretë më të madh në botë të të infektuarve me koronavirus, duke bërë që shumë kompani të zhvillojnë provat atje.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.