Vaksinimi i dhelprave kundër tërbimit – Lejohet gjuetia për arsye monitorimi pasvaksinal
Këshilli i Ministrave ka miratuar vendimin për lejimin e gjuetisë së dhelprës së kuqe, për arsye monitorimi shkencor pasvaksinal që realizohet në kuadër të Projektit PAZA II i mbështetur nga Bashkimi Evropian.
Referuar vendimit të qeverisë, gjuetia do të realizohet nëpërmjet marrjes së kampionëve të dhelprës së kuqe në të gjithë vendin, duke përjashtuar zonat e mbrojtura. Kjo do të bëhet gjatë një periudhe njëmujore në ditët e enjte, e premte dhe të shtunë, pas hyrjes në fuqi të këtij vendimi.
Për realizimin e këtij procesi do të angazhohen 39 punonjës të Agjencisë Kombëtare të Zonave të Mbrojtura, të cilët do të marrin kampione në çdo qark.
Sipas vendimit, i gjithë procesi i marrjes së kampionëve do të monitorohet nga Inspektorati Shtetëror i Mjedisit, Pyjeve dhe Ujërave. Ndërkohë, puna për marrjen e tyre dhe dërgimin në laboratorë për analizimin dhe nxjerrjen e rezultateve, si dhe për raportimin e përfundimit të fazës së tetë të monitorimit pasvaksinal kundër sëmundjes së tërbimit të dhelprës së kuqe në Shqipëri do të bëhet nga Ministria e Buqësisë dhe Zhvillimit Rural.
SCAN
Vaksinimi i dhelprave, Shqipëria nis fushatën ajrore me 4 avionë të vegjël kundër tërbimit
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.