Vaksinimi, ku renditet Shqipëria? Harta globale, jemi ndër vendet e fundit në botë, me 0.02 të vaksinuar për 100 banorë
Nga “Scan Intelligence Unit”
Janë rreth 80 shtete në të gjithë botën të cilat kanë nisur procesin e vaksinimit. “Ourworldindata” ka publike bazën më të zgjeruar të të dhënave për të gjurmuar procesin e vaksinimit në të gjithë botën me rifreskime ditore. Mes rreth 80 vendeve që kanë nisur këtë proces vaksonimi, gjendet edhe Shqipëria, të paktën deri më datë 9 shkurt, kur edhe të dhënat për vendin tonë janë publike. Në rajon, deri më 16 shkurt, vetëm Shqipëria dhe Serbia rezultojnë se e kanë nisur këtë proces. “Scan Intelligence Unit” ka përpunuar këto të dhëna për të zbuluar se si renditet Shqipëria krahasuar me vendet e tjera në botë. Nga këto të dhëna del në pah se në Shqipëri, deri më 9 shkurt, kanë marrë të paktën një dozë vaksine, rreth 0.02 njerëz për 100 banorë. Kjo normë na rendit ndër tre vendet e fundit në botë, mes atyre që kanë nisur procesin, ndërkohë që më shumë se gjysma e vendeve të botës, përfshirë Kosovën, Malin e Zi, Maqedoninë e Veriut dhe Malin e Zi, nuk e kanë nisur ende këtë proces. Mesatarja e Bashkimit Europian fiksohet në 3.23 vaksinime për 100 banorë, ndërsa ajo globale në 1.22.
Në tabelë dhe në hartë, me zero ose pa shifër figurojnë shtetet për të cilat mungojnë të dhënat e vaksinimit për 100 banorë, dhe jo shtetet të cilat nuk e kanë nisur vaksinimin. Të dhënat marrin për bazë të gjitha vaksinat, në varësi të atyre të aprovuara në secilin shtet. Për momentin, Shqipëria ofron vetëm vaksinën e Pfizer/Biontech. Në nivel global, Gjibraltari renditet i pari, me 47.9 vaksinime për 100 banorë, ndjekur nga Izraeli, me rreth 47 vaksinime për 100 banorë. Në vend të tretë renditet Seychelles. Në renditje ndjek Mbretëria e Bashkuar. Serbia ndërkohë, renditet e 13-ta në botë, me rreth 14 vaksinime për 100 banorë. Duhet kujtuar se Serbia nuk disponon vetëm një vaksinë, por disa të tilla, me atë ruse që zë një fokus të madh.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.