Vaksinimi kundër gripit – Bino: Kategoritë e riskut, edhe më të prekshmit nga COVID-19
Programi i vaksinimit kundër gripit do të vijojë edhe këtë vit në qendra shëndetësore për grupet e riskuar, ndërkohë që autoritet shëndetësore e shikojnë si pjesë të strategjisë për të përballuar situatën e krijuar nga COVID-19. Silva Bino, shefe e Departamentit të Sëmundjeve Infektive në Institutin e Shëndetit Publik, tha se gjatë kësaj kohe është bërë vlerësimi i kategorive të riskut të cilët duhet të vaksinohen ndaj gripit, por që njëkohësisht janë edhe më të prekshëm nga Sars Cov2.
“Ne kemi bërë vlerësimin dhe rivlerësimin e kategorive të riskut, të cilat janë të rëndësishme për vaksinimin ndaj gripit dhe njëkohësisht janë subjekte të cilat janë dhe më të prekshme nga Covid19. Për shembull, personat me sëmundje kronike, natyrisht punonjësit shëndetësorë, mësuesit dhe të gjithë kujdestarët të cilët kujdesen për fëmijët si dhe fëmijët nga 2 deri në 5 vjeç, sepse ata transmetojnë më shumë gripin. Shpresojmë të kemi një situatë më të mirë të kontrollit të gripit, gjë e cila do të na ndihmojnë edhe për Covid19”.
Ndërkaq, gjatë inspektimit të investimit të qeverisë shqiptare për zinxhirin ftohës për ruajtjen e vaksinave, ministrja Ogerta Manastirliu tha se po forcohen kapacitetet e testimit dhe paralelisht po rriten kapacitetet përsa i përket programit të vaksinimit.
“Po përgatitemi për të vijuar përballjen me epideminë e Covid, që sipas strategjisë dhe planit të veprimit aktiv që ne kemi aktualisht, jemi duke forcuar kapacitetet e testimit, gjurmimit, hetimit epidemiologjik, kapaciteteve të spitaleve. Ndërkohë që ne përgatitemi dhe vijojmë të fuqizojmë kapacitetet tona përsa i përket situatës së Covid19, vijojmë të rrisim edhe kapacitetet tona përsa i përket edhe programeve për vaksinimin e sigurt, siç është programi i vaksinimit ndaj gripit për grupet e riskuara dhe rritjen e mbulesës vaksinale”.
Vitin e kaluar, Ministria e Shëndetësisë shtoi fëmijët 2-5 vjeç si grupe të riskuar, duke i listuar te kategoritë që mund ta kryejnë falas vaksinën e gripit. Ndërkohë që, nëpër ëndrrat shëndetësore u shpërndanë 138 mijë vaksina të nevojshme për të mbuluar të gjitha kategoritë, sikurse janë të moshuarit, personeli shëndetësore apo të sëmurët me sëmundje kronike.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.