Vaksinimi me AstraZeneca, Dasho: “Të vërtetën duhet ta presim nga EMA, ekspertët të sqarojnë mësuesit”

Mungesa e sigurisë krijuar së fundmi mbi vaksinën Astrazeneca  dhe pezullimi i saj prej disa vendeve europiane  dhe jo vetëm, pas disa raportimeve për efekte anësore,  ka vënë në dyshim qytetarët për aplikimin e saj. Sipas mjekut epidemiolog,  Erion Dasho të vërtetën mbi këtë vaksinë  duhet ta presim  vetëm nga  Agjencia  Evropiane e Barvnave.

“Të vërtetën duhet të presim ta dëgjojmë nga autoritetet kompotentet. EMA është një e tillë, si nga më prestigjiozet e barnave dhe po kështu të gjitha vendet që kanë vendosur një pezullim të përkohshëm të vaksinës hyjnë në vendet me institucionet të konsoliduara, më të besueshmet dhe që nuk ndikohen as nga politika dhe as nga bizneset. Bëhet fjalë për disa shenja të rralla që janë shfaqur me natyrë trombotike, të cilat kanë ngjallur jo pa arsye mekanizmat e farmako-vigjilencës dhe kanë nxitur një hetim që po kryhet në çdo vend ku po aplikohet vaksina e AstraZenecës.”

Dasho tha se nga ana mjekësore nuk ka arsye për ta ndërprerë  këtë proces  në vendin tonë, ndërkohë që nënvizoi si shumë të rëndësishëm sqarimin  e mësuesve të cilët po e aplikojnë këtë vaksinë, nga ekspertët.

“Nëse ne duam që kjo fushatë vaksinimi të vazhdojë e sigurtë, e pranueshme te personat që ofrohen, këta ekspertë duhet të shkojnë dhe të komunikojnë hapur me mësuesit online, ti sqarojnë atyre të gjithë këto elementë, ti sqarojnë se mundësia për të zhvilluar komplikacione është shumë e vogël dhe nuk ja vlen të shqetësohen. Në këtë mënyrë ti ofrojnë mundësitë atyre që në mënyrë vullnetare të zgjedhin nëse duan ta aplikojnë vaksinën tani apo pas dy javësh kur të vijë edhe përgjigja e EMA apo autoriteteve të tjera.”

Mjeku epidemiolog vlerësoi si mjaft të rëndësishme zbutjen e efekteve psikologjike  duke apeluar për të mos neglizhuar në këtë rast.

Nertila Doko / SCAN  

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.