Vala e dytë godet rëndë Europën. Kthehet në rajonin e dytë në botë që kalon 250,000 vdekje nga Covid-19
Europa është kthyer në rajonin e dytë pas Amerikës Latine që kalon 250,000 vdekje nga Covid-19 gjatë fundjavës, ndërkohë që rastet e raportuara në 2 javët e fundit kanë prekur nivele rekord çdo ditë. Europa raportoi 200,000 infeksione për të parën herë ditën e Enjte, ndërkohë që shumë vende të Jugut kanë pasur këtë javë numrin më të lartë të rasteve në një ditë. Europa mban thuajse 19% të vdekjeve nga koronavirusi në botë dhe rreth 22% të rasteve. Mbretëria e Bashkuar, Italia, Franca, Rusia, Belgjika dhe Spanja kanë thuajse 2/3 e 250,000 vdekjeve të regjistruara deri më tani, nga një total prej 8 milionë rastesh në Europë.
Mbretëria e Bashkuar ka numrin më të lartë të vdekjeve në rreth 45,000, ndjekur nga Italia, Spanja, Franca dhe Rusia. Kryeministri Boris Johnson deklaroi gjatë javës se Britania nuk mund të mbështetet tek pritja e vaksinës dhe do të duhet të përdorë masa të tjera për të ngadalësuar pandeminë. Bazuar tek mesatarja ditore e vdekjeve në 7 ditët e fundit, Rusia mban vendin më famëkeq, me 250 vdekje në ditë, ndjekur nga Britania dhe Franca me rreth 143 secila.
Franca është kthyer në vendin e 7 që raporton mbi 1 milionë raste me koronavirus gjatë fundjavës dhe ka qenë një prej vendeve më të goditura nga vala e dytë, ç’ka ka sjellur vendosjen e shtetrrethimit në pjesën më të madhe të vendit. Numri mesatar i vdekjeve nga Covid-19 të raportuara çdo ditë në Francë është rritur për 10 ditë me radhë. Spanja ka kaluar së fundmi 1 milionë raste dhe raporton 136 vdekje në ditë, sipas mesatares 7 ditore. Norma e vdekjeve në Spanjë, në 7.38 për 10,000 banorë, është më e larta në Europë dhe e dyta më e lartë në botë pas Perusë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.