Valët e nxehta dhe ndryshimet e motit “mund të vrasin mbi 100 mijë njerëz në vit në Europë”
Më shumë se 100.000 europianë mund të vdesin çdo vit nga ndryshimet drastike të motit, si zjarre, stuhi dhe përmbytje deri në fund të shekullit, parashikojnë shkencëtarët.
Deri në vitin 2100, fatkeqësitë e lidhura me motin mund të ndikojnë në dy të tretat e popullsisë së Europës në një vit, thonë ekspertët.
Ky parashikim vjen nëse nuk merren asnjë masë parandaluese për të reduktuar emisionet e gazrave serrë dhe nëse nuk bëhet asgjë për të përmirësuar mbrojtjen nga ngjarjet ekstreme të motit.
Vdekjet vjetore të shkaktuara nga moti ekstrem mund të rriten 50 herë nga 3,000 në vitet 1981-2010 në 152,000 në vitet 2071 – 2100, sipas parashikimit të botuar në revistën “The Lancet Planetary Health”.
Studimi analizoi ndikimin e mundshëm të shtatë llojeve më të rrezikshme të ngjarjeve të lidhura me motin, siç janë valë e nxehta, ngrica, zjarre, thatësira, përmbytje lumore dhe bregdetare, dhe stuhitë e erës në 28 vende të Bashkimit Europian së bashku me Zvicrën, Norvegjinë dhe Islandën.
“Ndryshimi i klimës është një nga kërcënimet më të mëdha globale për shëndetin njerëzor të shekullit 21 dhe rreziku i tij ndaj shoqërisë do të jetë gjithnjë e më i lidhur me rreziqet e nxitura nga moti. Përveç nëse ngrohja globale frenohet si një çështje urgjente dhe masat e duhura janë marrë, rreth 350 milionë evropianë mund të ekspozohen ndaj ekstremeve të dëmshme klimaterike në baza vjetore deri në fund të shekullit”, tha shkencëtari kryesor Dr Giovanni Forzieri nga Qendra e Përbashkët Kërkimore e Komisionit Europian në Itali.
Europa Jugore ka të ngjarë të jetë më e goditur nga fatkeqësitë e motit, kryesisht për shkak të valëve të nxehtësisë dhe thatësirës, sipas studimit.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.