Varësia e BQE te bankierët – Bankat nën mbikqyrje zënë pjesën më të madhe në grupet këshilluese
Banka Qendrore Europiane drejtohet thuajse gjithmonë te bankierët për këshilla mbi çështjet financiare, duke u ekspozuar ndaj riksut të varësisë ndaj sektorit që duhet të mbikëqyrë. Observatori Europian i Korporatave (CEO), që monitoron lobimin në institucionet europiane, tregoi në një raport se 508 nga 517 vende në grupet këshilluese të Bankës Qendrore Europiane, janë zënë nga përfaqësues të sektorit financiar.
Bankat nën mbikëqyrje të BQE, mbajnë pjesën më të madhe, te të cilat institucioni në Frankfurt përdor për të marrë informacion për zhvillimet ekonomike dhe të tregut, si dhe infrastrukturën financiare dhe të pagesave. Firma e shërbimeve financiare Euroclear, kishte përfaqësinë më të madhe, ndjekur nga Deutsche Bank e Gjermanisë dhe 2 huadhënësit më të mëdhenj francezë, BNP Paribas e Societe Generale.
Këto janë 3 bankat më të mëdha në Europë që mbikëqyren në mënyrë të drejtpërdrejtë nga BQE. “Përbërja e grupeve këshilluese të BQE, krijon ekspozimin ndaj rrezikut që procesi rregullator të cenohet nga grupet e interesit”, raporton CEO. Lidhja e Bankës Qendrore Europiane me industrinë financiare është nën shqyrtim nga Bashkimi Europian, pas një ankese të mëparshme nga kjo organizatë, mbi përfshirjen e presidentit Mario Draghi dhe zyrtarëve të tjerë në G30, që përfshin bankierë dhe menaxhere të fondeve.
Përveç rolit si mbikëqyrës bankar, Banka Qendrore Europiane ka qenë lojtari më i rëndësishëm në tregjet financiare në Europë në vitet e fundit nëpërmjet programit të blerjes së obligacioneve prej 2 trilionë euro. Reuters raportoi në vitin 2015 se 3 tregtarë të akuzuar për manipulimin e normave të Euriborit, ishin pjesë e grupit të kontaktit të tregut të parasë së BQE.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.