Varësia jonë ndaj eksporteve – Vetëm 1/3 e PBB, bashkë me Kosovën, të fundit në rajon
Me eksportet që zënë rreth 1/3 e Prodhimit të Brendshëm Bruto të vendit tonë, Shqipëria është ndër vendet e fundit në Europën Qendrore dhe Lindore, thotë një studim i fundit i Institutit të Vienës. Sipas këtij studimi, në Shqipëri, eksportet zënë pak më shumë se 30% të PBB, duke na renditur në vendin e 4-t në Europën qendrore dhe lindore në këtë drejtim, pas Turqisë, Rusisë dhe Kosovës. Varësia nga eksportet jo domosdoshmërisht është një ogur i mirë për ekonominë e një vendi të caktuar, pasi e bën atë vulnerabël ndaj rreziqeve të mundshme.
Ndër vendet e rajonit, vetëm Kosova është më keq se ne, duke u renditur e treta sa i përket peshës më të ulët që zënë eksportet në ekonominë e përgjithshme. Për Malin e Zi norma ngjitet në rreth 40% ndërsa për Serbinë në rreth 50%. Për ekonomitë më të zhvilluara të botës, si SHBA, Japonia apo edhe Kina, vendi më i madh eksportues në botë, kjo normë është mjaft e ulët, nga 10% deri në 20%, pasi janë ekonomi prodhuese.
Por, në rastin e Shqipërisë kjo nuk vlen, pasi nuk varet as nga eksportet e as nga prodhimi. Diçka e tillë e bën vendin tonë të jetë më imun ndaj krizave të jashtme e sidomos luhatjeve të valutës apo lëndëve të para. Të dhënat i referohen vitit 2017 dhe nuk reflektojnë ecurinë e tregtisë së jashtme përgjatë vitit të kaluar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.