Varianti i ri i COVID-19, omicron – OBSH: Mbyllja e kufijve është e nxituar. Duhen prova shkencore të rrezikshmërisë
Organizata Botërore e Shëndetësisë (OBSH) e klasifikoi variantin B.1.1.529 të zbuluar në Afrikën e Jugut si një “variant shqetësues” SARS-CoV-2, duke thënë se mund të përhapet më shpejt se format e tjera. Provat paraprake sugjeruan se ekziston një rrezik i shtuar i riinfeksionit dhe kishte pasur një “ndryshim të dëmshëm në epidemiologjinë e COVID-19”, tha drejtuesja teknike e OBSH-së për COVID-19, Maria Van Kerkhove, pas një takimi të ekspertëve të pavarur që shqyrtuan të dhënat.
“Sot po njoftojmë se B.1.1.529 është një variant shqetësues i quajtur omicron,” shtoi ajo.
Infeksionet në Afrikën e Jugut ishin rritur ndjeshëm në javët e fundit, duke përkuar me zbulimin e variantit omicron, njoftoi OBSH. Omicron është varianti i pestë që mban një emërtim të tillë.
“Omicron B.1.1.529 është emërtuar si një variant shqetësues sepse ka disa veti të rrezikshme. Ky variant ka një numër të madh mutacionesh dhe disa nga to kanë karakteristika shqetësuese,” theksoi Van Kerkhove. Sipas saj, testet aktuale PCR vazhdojnë të zbulojnë me sukses variantin.
Më herët, OBSH paralajmëroi vendet kundër vendosjes së ngutshme të kufizimeve të udhëtimit të lidhura me variantin e ri të COVID-19, duke thënë se ato duhet të marrin një “qasje të bazuar në rrezikun shkencor”.
Autoritetet globale reaguan në alarm ndaj variantit të ri të zbuluar në Afrikën e Jugut, me BE-në dhe Britaninë mes vendeve që forcuan kontrollet kufitare, ndërsa shkencëtarët kërkuan të zbulonin nëse mutacioni ishte rezistent ndaj vaksinës.
Do të duhen disa javë për të përcaktuar transmetueshmërinë e variantit dhe efektivitetin e vaksinave dhe terapive kundër tij, tha Van Kerkhove, duke vënë në dukje se deri më tani janë raportuar 100 sekuenca të variantit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.