Vatrat e “nxehta” të COVID-19 – Rriten rastet e reja në 1 javë, 81% e të prekurve në 10 qytete
1128 raste të reja me COVID-19 u shënuan gjatë javës që lamë pas, sipas raportimit ditor të Ministrisë së Shëndetësisë, duke shënuar një rritje në raport me një javë më parë, ku u regjistruan 1010 raste. Sipas të dhënave të përpunuara nga TV SCAN Tirana mbetet qyteti me numrin më të lartë të infektuarve të rinj gjatë periudhës 6-11 tetor me 524 raste apo 58 raste më shumë se java paraardhëse. Korça dhe Fieri janë 2 qytetet e tjerë që kanë regjistruar më shumë të infektuar të rinj gjatë javës që lamë pas me 73 dhe 57 raste.
Ndërkohë që, pas tyre vijnë Elbasani dhe Durrësi me nga 53 raste, Shkodra me 49 raste dhe Lushnja me 31 raste të reja. Berati regjistroi 27 raste të reja, ndërsa Kavaja dhe Vlora nga 24 raste, duke u pozicionuar në 10 qytetet me numrin më të lartë të të infektuarve të rinj. Këto qytete zënë rreth 81% të të gjithë rasteve të regjistruar javën që shkoi, ndërkohë që pjesa tjetër prej 19%, ndahet mes 39 qyteteve të tjerë të vendit.
Sipas raportimeve zyrtare raste të rinj me COVID-19 u regjistruan në total në 49 qytete, çka do të thotë se në 12 bashki të tjera, të paktën prej 1 jave nuk raportohen raste të infektuarish të rinj. Ajo që bie në sy javën e fundit është një shtrirje e COVID-19 në më shumë qytete, në raport me javët paraardhëse, ndërkohë që në shumë prej qyteteve ku strukturat shëndetësore raportojnë raste të reja numërojnë vetëm nga 1 rast gjatë gjithë javës që lamë pas.
Në total, deri të dielën në të gjithë vendin numërohen 5479 qytetarë të infektuar aktivë, një shifër që ka pësuar rritje në raport me një javë më parë ku numëroheshin 5195 qytetarë të infektuar me COVID-19.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.