Vazhdojnë kërkimet në Athinë – Dëme kolosale, mbi 1500 banesa të shkatërruara
Ekipet e shpëtimit në Greqi kanë vazhduar kërkimet ditën e Mërkurë, në zonat bregdetare që patën prekjen më të keqe nga zjarret, për të zbuluar më shumë viktima, ndërkohë që numri i vdekjeve arriti në 80.
Departamenti i zjarrfikësve bëri të ditur se autoritetet kanë marrë qindra telefonata për njerëz të humbur, duke shtuar se personat e raportuar të humbur mund të jenë pjesë e viktimave ose mund të jenë kthyer te familjet e tyre pa informuar autoritetet.
Nuk ka ende një numër të saktë për njerëzit që kanë humbur. Ndërkohë, policia bëri të ditur se 4 persona të dyshuar për plaçkitje në zonën Neos Voutzas janë arrestuar.
Rojet bregdetare kanë kontrolluar zonat në bregdet që u prekën nga zjarret, pasi shpëtuan më shumë se 700 njerëz që u arratisën drejt plazheve për t’i shpëtuar flakëve. Ekipet e shpëtimit kanë caktuar njësi në Mati, Rafinja dhe Kineta për të shpërndarë ushqime ndaj qindra banorëve që humbën shtëpitë e tyre.
Sipas kryebashkiakut të Rafinjës, Evangelos Bournous, më shumë se 1,500 shtëpi janë shkatërruar nga flakët, ndërsa për dëmin në pyje, vlerësohet se kalon 2,100 hektarë.
Duke e quajtur një “tragjedi të papërshkrueshme”, kryeministri Aleksis Tsipras shpalli 3 ditë zie kombëtare. Ai shtoi se arsyet e kësaj tragjedie dhe personat përgjegjës do të hetohen në një kohë më të përshtatshme.
Qeveria greke lajmëroi një paketë emergjencë të ndihmave prej 20 milionë euro nga burimet e Programit të Investimeve Publike.
Masat e para lehtësuese nga shteti do të reduktojnë detyrimet tatimore për banorët në zonat e ndikuara, do t’i përjashtojnë ata nga pagesat e taksës mbi pronën dhe ngrijnë pagesat e kredive në banka, ndërkohë që do të krijohet një llogari speciale për dëmet materiale, sipas zëdhënësit të Qeverisë, Dimitris Tzanakopoulos.
“Ne i qëndrojmë pranë grekëve në këtë kohë të vështirë”, deklaroi Komisioni Europian, ndërkohë që flamujt jashtë godinës në Bruksel, janë ulur në gjysmë shtizë në shenjë zie për viktimat.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.