Vazhdon tkurrja monetare – FED rrit normën bazë në 2-2.25%. Objektivat janë arritur
Rezerva Federale në Shtetet e Bashkuara rriti normën bazë të interesit me 0.25% këtë javë, duke bërë ndërhyrjen e tretë deri më tani për vitin dhe të tetën që prej fundit të vitit 2015. “Duke marrë parasysh kushtet e tregut të punës dhe inflacionit, Komisioni Federal i Tregut të Hapur vendosi të rrisë vargun e normës së fondeve federale në 2-2.25%”, deklaroi Banka Qendrore pas përfundimit të takimit dy-ditorë.
Rezerva Federale bëri të ditur se tregu i punës në SHBA ka vazhduar të fuqizohet dhe aktiviteti ekonomik është rritur bindshëm, ndërkohë që shpenzimet e ekonomive familjare dhe investimet e bizneseve janë përshpejtuar. Sistemi Bankar Qendror theksoi se inflacioni qëndron pranë objektivit të vet në 2%. Rezerva Federale pret që ekonomia e SHBA të rritet me 3.1% këtë vit, sipër normës prej 2.8% që prishte në Qershor.
Rritja e qëndrueshme ekonomike dhe rënia e papunësisë pritet t’i japin nxitje bankës që të vazhdojë ciklin tkurrës monetar, në mënyrë që të parandalojë mbinxehjen e ekonomisë amerikane. Politikëbërësit parashikuan një tjetër rritje për këtë vit dhe tregjet e presin këtë ndërhyrje në fund të muajit Dhjetor. Banka braktisi udhëzimin se politikat monetare do të vazhdojnë lehtësuese, por Guvernatori Jerome Powell nuk i dha shumë rëndësi kësaj fraze. “Ne presim ende rritje graduale të normës së fondeve federale”, tha Jerome Powell.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.