Vdekjet nga Covid-19 kalojnë 1 milion! Mbi 5,400 njerëz vdesin çdo 24 orë. SHBA, Brazili dhe India mbajnë 45%
Mbi 1 milionë njerëz kanë vdekur nga Covid-19 në të gjithë botën dhe norma e vdekjeve po përshpejtohet, ndërkohë që infeksionet po rriten përsëri në shumë shtete. Vdekjet nga sëmundjet e lidhura me koronavirusin janë dyfishuar nga gjysmë milionë 3 muaj më parë, nxitur nga vdekjet në Shtetet e Bashkuara, Brazil dhe Indi. Mbi 5,400 njerëz në botë po vdesin çdo 24 orë sipas përllogaritjeve të Reuters, bazuar tek mesatarja e vdekjeve për Shtatorin.
Kjo përkthehet në 226 njerëz në orë, apo një person në çdo 16 sekonda. Brenda një loje futbolli, kanë vdekur 340 njerëz në mesatare, sipas Reuters. Shtetet e Bashkuara, Brazili dhe India mbajnë thuajse 45% të të gjithë vdekjeve të Covid-19 në botë, ndërkohë që vetëm rajoni i Amerikës Latine ka mbi 1/3 e tyre. India është epiqendra e fundit botërore e pandemisë, duke regjistruar rritjen më të madhe ditore të infeksionit, me një mesatare prej 87,500 rastesh çdo ditë, që prej nisjes së Shtatorit.
Me trendin aktual, India do të kalojë Shtetet e Bashkuara, si vendi me më shumë raste të konfirmuara deri në fund të vitit, pavarësisht se qeveria e kryeministrit Narendra Modi po përpiqet të lehtësojë masat e karantinës, për të nxitur ekonominë. Pavarësisht rritjes së rasteve, India ka rreth 95,500 vdekje dhe norma qëndron poshtë Shteteve të Bashkuara, Britanisë dhe Brazilit. Ekspertët e shëndetësisë kanë theksuar prej kohësh se numri i rasteve dhe vdekjeve në botë është nënraportuar, veçanërisht në shtetet me kapacitet të limituar të testeve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.