”Vdes”projekti turk/ 90% të miliona fidanëve të mbjellë në Turqi janë tharë
Deri në 90% të miliona fidanëve të mbjellë në Turqi si pjesë e një projekti rekord të mbjelljes masive mund ‘’të kenë vdekur’’ pas vetëm disa muajsh, sipas sindikatës së bujqësisë dhe pylltarisë së vendit.
Më 11 nëntor të vitit të kaluar, ditë e cila u shpall nga qeveria turke si Dita Kombëtare e Pyllëzimit, 11 milion pemë u mbollën nga vullnetarët në më shumë se 2,000 pika në të gjithë vendin, duke u përfshirë dhe presidenti turk, Rexhep Tajip Erdogan, si dhe kryetari i parlamentit, Mustafa Şentop. Programi i mbështetur nga qeveria theu rekordin botëror për shumicën e pemëve të mbjellë në një orë, në një lokacion të vetëm, me 303.150 fidanë të mbjellë në qytetin verior të Anatolisë, Çorum.
Kreu i sindikatës pohoi, se pavarësisht të gjithë përpjekjes gati 90% e fidanëve të mbjellë, janë inspektuar nga ekipet e tij dhe rezultojnë së janë tharë për shkak të pamjaftueshmërisë së ujit. Gjithashtu sipas ekspertëve, tharja e fidanëve ka ndodhur dhe për shkak se ato janë mbjellë në kohën e gabuar dhe jo nga ekspertët. Përpos gjithë faktorëve, shtohet dhe fakti që Turqia ka pasur mungesë të reshjeve të shiut, duke e rënduar kështu akoma më shumë gjendjen e fidanëve.
Ministria e bujqësisë dhe pylltarisë e mohoi këtë pretendim dhe tha se “nga sot, 95% e 11 milion fidanëve të mbjellë janë të shëndetshëm dhe vazhdojnë të rriten”.
Sindikata hedh dyshime mbi pretendimet e qeverisë, duke nxitur me anë të këtyre deklaratave, edhe më shumë, debatin global për mbjelljen masive të pemëve. Por përtej të gjitha diskutimeve, Erdogan ka deklaruar se Dita Kombëtare e Pyllëzimit do të përsëritet çdo 11 nëntor. Partia qeverisëse AK pretendon se ka mbjellë më shumë se 4.5 miliardë fidanë në 17 vitet e saj në pushtet. Sidoqoftë, politikat e saj mjedisore vazhdojnë të tërheqin kritika, së fundmi rreth shkatërrimit të pyjeve për ndërtimin e aeroportit të ri të Stambollit, dhe mbi planet për të krijuar një kanal 45 km për të devijuar trafikun e anijeve nga Bosfori.
Burimi: The Guardian
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.