Veliaj i dhuron “Çelësin e Qytetit” këngëtares shqiptare me famë botërore, Rita Ora
Kryetari i Bashkisë së Tiranës, Erion veliaj i ka dhuruar “Çelësin e Qytetit” në shenjë mirënjohjeje këngëtares shqiptare me famë botërore, Rita Orës. Kjo e fundit dhuroi mbrëmjen e kaluar emocione të paharrueshme për mijëra shqiptarë të mbledhur në koncertin e zhvilluar në sheshin “Skënderbej.”
Veliaj falënderoi këngëtaren jo vetëm për imazhin që përcjell në botë si përfaqësuese e shqiptarëve, por edhe si një frymëzuese të brezit të ri.
“Duke i dhënë dikujt çelësin, i jep të vetmen gjë që ti ke. Ne nuk jemi të pasur, por përpiqemi të japim gjithçka që kemi si shenjë respekti dhe shenjë e derës së hapur, prandaj, duke të dhuruar Çelësin e Tiranës do të thotë se të vlerësojmë shumë”, tha Veliaj.
Ndërkohë, Ora shprehu vlerësimin e saj për ndryshimin që po pëson Tirana, duke u shprehur se është në rrugën e saj drejt një suksesi të pabesueshëm.
“Mendoj se Tirana është në rrugën e saj drejt një suksesi të pabesueshëm. Me fuqinë dhe mundësitë që unë kam, do t’ia bëj të ditur këtë pjesës tjetër të botës. Mendoj se jemi në rrugën e duhur, ka energjinë më të mirë të çdo qyteti në tokë. Nga hera e fundit që isha këtu, pa dyshim që energjia ka ndryshuar, ndjehesh gjallë, miqësore, e pëlqyer dhe shumë pozitive. Ndjehem shumë mirë që jam pjesë e kësaj”, u shpreh Ora.
Krahas repertorit të saj muzikor, Ora surprizoi të pranishmit edhe me një miksim të një prej hiteve të saj me një nga vallet më të njohura të trevave shqiptare, asaj të Rugovës.
Ndërkohë, prej tre ditësh sheshi “Skënderbej” u shndërrua në një qendër artistike ku u zhvilluan dy koncerte madhështore, ku performuan këngëtarë vendas dhe me origjinë shqiptare me famë botërore.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.