Vendi i Azisë Jugore kërkon 3 miliardë dollarë në muaj ndihmë të jashtme për të shmangur krizën e rëndë ekonomike!
Sri Lanka do të ketë nevojë për rreth 3 miliardë dollarë ndihmë të jashtme brenda gjashtë muajve të ardhshëm për të ndihmuar në rivendosjen e furnizimeve me artikuj thelbësorë, duke përfshirë karburantin dhe ilaçet, për të menaxhuar një krizë të rëndë ekonomike, tha të shtunën ministri i saj i financave.
Vendi ishull me 22 milionë banorë është goditur nga ndërprerje të zgjatura të energjisë elektrike, me mungesë të theksuar për ilaçe, karburant dhe sende të tjera, fenomen që i ka nxjerrë protestuesit e zemëruar në rrugë dhe duke e vënë Presidentin Gotabaya Rajapaksa nën presion në rritje.
“Është një detyrë herkuliane,” i tha Reuters Ministri i Financave Ali Sabry në intervistën e tij të parë që nga marrja e detyrës këtë javë, duke iu referuar gjetjes së 3 miliardë dollarëve në financim urë ndërsa vendi ishte gati për negociatat me Fondin Monetar Ndërkombëtar (FMN) këtë muaj.
Sri Lanka do të kërkojë të ristrukturojë obligacionet sovrane ndërkombëtare dhe të kërkojë një moratorium mbi pagesat, dhe është e sigurt se do të negociojë me mbajtësit e obligacioneve për një pagesë të ardhshme prej 1 miliard dollarësh në korrik.
Analistët e J.P. Morgan vlerësuan këtë javë se shërbimi i borxhit bruto të Sri Lankës do të arrinte në 7 miliardë dollarë këtë vit, me deficitin e llogarisë korente në rreth 3 miliardë dollarë. Sri Lanka do të kërkojë një linjë tjetër krediti prej 500 milionë dollarësh nga India për karburant, e cila do të mjaftonte për rreth pesë javë kërkesa, tha Sabry.
Qeveria do të kërkojë gjithashtu mbështetje nga Banka Aziatike e Zhvillimit, Banka Botërore dhe partnerët dypalësh duke përfshirë Kinën, Shtetet e Bashkuara, Britaninë dhe vendet në Lindjen e Mesme.
Rezervat valutore të Sri Lankës qëndruan në rreth 1.93 miliardë dollarë në fund të marsit. Të premten, një guvernator i ri i bankës qendrore rriti normat e interesit me 700 pikë bazë të paprecedentë në një përpjekje për të zbutur inflacionin në rritje dhe për të stabilizuar ekonominë.
Në një përpjekje për të rregulluar financat e qeverisë, Sabry tha se vendit do t’i duhet të rrisë normat e taksave dhe të rrisë më tej çmimet e karburantit brenda gjashtë muajve të ardhshëm. RTS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.