“Vendi i opozitës ne Kuvend”, Arvizu: Shqipëria meriton më shumë nga BE

Ish ambasadori i SHBA Aleksandër Arvizu është rikthyer në Tiranë, pasi është dekoruar nga Presidenti i Republikës “Për merita të veçanta civile”. Në fjalën e tij Ambasadori Arvizu vlerësoi progresin e Shqipërisë drejt integrimit europian.

“Shqipëria meriton më shumë nga BE, edhe pse në disa raste ka qenë “viktimë” e standardeve të dyfishta dhe nuk ka marrë atë që meriton. Shqipëria është e qartë që për të nuk ka alternativë tjetër përveç marshimit drejt BE-së dhe fuqizimit të marrëdhënieve me ShBA, deklaroi ish-ambasadori gjatë takimit me kreun e Kuvendit Gramoz Ruçi.

“Shqipëria mund të bëhet”, u shpreh Arvizu, duke i bërë thirrje opozitës të kthehet në Kuvend.

 “Por vendi i opozitës është në Kuvend dhe me prezencën dhe betejat e saj politike e parlamentare ajo duhet tu japë shqiptarëve dhe mbështetësve të saj arsye dhe motive për ta votuar. Shqiptarët nuk duhet të humbasin shpresën dhe besimin te vetja e tyre se Shqipëria mund të bëhet. Ata vetë duhet të kontribuojnë për ndryshimin si edhe për përballimin e problemeve që ka vendi, si korrupsioni, lufta kundër krimit të organizuar etj. Vetë Shqipëria është një vend dhe një partner i besueshëm.”

Kryetari Ruçi e falënderoi Ambasadorin Arvizu për misionin e tij të suksesshëm në Tiranë.

“Ju jeni jo thjesht ambasadori më jetëgjatë i ShBA në Tiranë, por një ambasador shumë i suksesshëm. Ju kini qenë konsistent dhe konstant në qëndrimet Tuaja, si me shumicën qeverisëse, ashtu edhe me opozitën. Ju keni bërë maksimumin për të zbutur konfliktet e ashpra politike në Shqipëri dhe na jeni gjendur pranë të gjithëve, qeverisë dhe opozitës, me ndërhyrjet Tuaja në kohën e duhur, në vendin e duhur dhe me elegancën e duhur. Dekorata e akorduar nga Presidenti i Republikës shpreh mirënjohjen e të gjithëve ne, institucioneve dhe qytetarëve të këtij vendi”.

 E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.