Vendimet e qeverisë/1 milion euro për riparimin e dëmeve të shkaktuara nga breshëri
Qeveria e Kosovës ka vendosur që të japë 1 milion euro për riparimin e dëmeve të shkaktuara nga breshëri në komunën e Rahovecit. Lajmi u bë i ditur nga kryeministri Ramush Haradinaj në një postim në rrjetet sociale, ku njoftoi edhe miratimin e disa vendimeve të tjera me karakter lehtësues për bujqësinë.
Me propozim të ministrisë së Financave është vendosur që të hiqet taksa doganore për importet e disa llojeve të bagëtive dhe shpendëve. Po ashtu janë liruar nga taksa doganore për mallrat e importuara bashkësitë fetare, me qëllim sigurimin e qëndrueshmërisë së tyre financiare.
Kryeministri i Kosovës, Z.Ramush Haradinaj, ka bërë me dije gjithashtu se është miratuar edhe nisma për lidhjen e Marrëveshjes ndërkombëtare me Republikën e Francës për vendosjen dhe aktivitetet e Agjencisë Franceze për Zhvillim, PROPACO dhe ‘Expertise France’ në Kosovë.
Tjetër nismë e aprovuar sot ka qenë dhe kërkesa e Shoqatave të dala nga Lufta e UÇK-së, për ndarjen e mjeteve financiare, të cilat do të përdoren për funksionim të shoqatave, për rehabilitim dhe trajtim të pjesëtarëve të shoqatave dhe për mbulimin e shpenzimit të varrimit të veteranëve të luftës së UÇK-së.
Në Mbledhjen e sotme të Qeverisë, aprovim ka marr edhe Korniza Afatmesme e Shpenzimeve 2020-2022, që paraqet dokumentin kryesor mbi bazën e të cilit do të hartohet Buxheti Vjetor për vitin 2020.
E.S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.