Vendimi i pazakontë i Qipros: Do të paguajë për pushimet e turistëve të infektuar
Qiproja është zotuar të mbulojë shpenzimet e pushimeve për këdo që teston pozitivisht për virusin pasi mbërrin në vend. Në një letër të bërë publike të Mërkurën, qeveria tha se do të paguante për akomodim, ilaçe dhe ushqime për pacientët dhe familjet e tyre.
Turistët “do të duhet të mbajnë vetëm koston e transferimit të aeroportit dhe fluturimit të riatdhesimit”. Është pjesë e një pakete masash që synojnë tërheqjen e vizitorëve në ishull, i cili ka raportuar pak raste.
Sipas të dhënave të Universitetit Johns Hopkins, vendi ka konfirmuar 939 infeksione dhe 17 vdekje. Turizmi zinte rreth 15% të PBB-së së vendit vitin e kaluar, dhe kështu qeveria po përpiqet të sjellë përsëri udhëtarët sa më shpejt të jetë e mundur. “Goditja është masive, dhe ne po përpiqemi të bëjmë çmos tani dhe të bëjmë atë që mundemi për pjesën e mbetur të sezonit,” tha zëvendësministri i turizmit, Savvas Perdios. “Ne kemi punuar jashtëzakonisht shumë për ta mbajtur virusin nën kontroll këtu”.
Zyrtarët thanë gjithashtu se një spital me 100 shtretër do të mbahej posaçërisht për turistët që testojnë pozitiv ndaj virusit, si dhe disa të ashtuquajtura “hotele karantinë” për familjet e pacientëve. Qiproja planifikon të rihapë aeroportet e saj në 9 qershor në një numër vendesh që konsiderohet të jenë me rrezik të ulët, përfshirë Gjermaninë, Greqinë, Izraelin dhe Maltën.
Autoritetet do të azhurnojnë listën javore. Sipas burimeve Perdios është shprehur se Mbretëria e Bashkuar dhe Rusia – të cilat së bashku përbëjnë më shumë se gjysmën e të gjithë pushuesve në Qipro – ka të ngjarë të lejohen të udhëtojnë në ishullin e Mesdheut në korrik.
Qeveritë europiane po diskutojnë se si të përgatiten më së miri për sezonin e verës pasi shpërthimi po vihet nën kontroll gati në të gjithë kontinentin. Javën e kaluar 11 shtete anëtare – Austri, Bullgari, Kroaci, Qipro, Gjermani, Greqi, Itali, Maltë, Portugali, Slloveni dhe Spanjë – ranë dakord për një sërë rregullash që synojnë lejimin e udhëtimit ndërkufitar ndërsa minimizojnë rrezikun e infeksioneve Covid-19 .(AP)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.